Golle Lilaaɓe 19 - Bible Fulfulde Bénin New Testament

Pol der siire bi'eteene Efesu

¹ No Apollos woni Korintu, Pol falti nokkuuje baalle, yottii Efesu. O tawi ton goonɗinɓe woɓɓe,

² o ƴami ɓe, o wi'i: «On keɓii *Ruuhu Ceniiɗo no goonɗinɗon na?» Ɓe toontii mo ɓe bi'i: «Men nanay du naa Ruuhu Ceniiɗo na'on.»

³ O ƴami ɓe, o wi'i: «*batisi iri moy keɓuɗon?» Ɓe toontii, ɓe bi'i: «batisi Yuhaana.»

⁴ Pol wi'i: «batisi tuubu nun Yuhaana waɗannoo, e wi'a himɓe goonɗina garoowo ɓaawo mum, waato Yeesu.»

⁵ No ɓe nani ka, ɓe gaɗanaa *batisi e inne Yeesu Joomiraawo.

⁶ No Pol yowi juuɗe mum dow ko'e maɓɓe, *Ruuhu Ceniiɗo jippii e maɓɓe, ɓee bata haalaaji janani, ɓee gaɗa annabaaku.

⁷ Ɓe gaɗan kamɓe himɓe sappo e ɗiɗo.

⁸ Pol naati der waajorde *Yahuduuɓe e waajoo ɓe e cuusal jaka lebbi tati, oo yeddontira e maɓɓe, oo tinnii faamingo ɓe haala *Laamaare Alla.

⁹ Amma woɓɓe sattini ko'e mum, salii goonɗingo, e jaanca laawol Joomiraawo yeeso himɓe fu. Kan waɗi Pol acci ɓe, hocci goonɗinɓe yawtidi ɓe feere, e waajoo nyalaane fu der suudu janŋirde bi'eteeɗo Tirannus.

¹⁰ Ɗum waɗii nunnun duuɓi ɗiɗi, faa wonɓe Asiya, diga Yahuduuɓe e ɓe lenyi janani fu, nani haala Joomiraawo.

Ɓiɓɓe Sikewas

¹¹ Alla waɗii haaynaareeji mawɗi e juuɗe Pol.

¹² Faa lincon naa bo gineeji meemuɗi ɓannu makko e yaaree, e yowee e nyawɓe. Den nyawuuji maɓɓe e heennya, ginnaaji bonɗi e wurtoo e maɓɓe.

¹³ *Yahuduuɓe woɓɓe woositintooɓe e riiwa ginnaaji, daarti wurtinirgo ɗi e inne Yeesu Joomiraawo, wi'i: «E inne Yeesu mo Pol waajoto haala muuɗum, burtee!»

¹⁴ Gooto e hooreeɓe *Limaamiiɓe *Yahuduujo bi'eteeɗo Sikewas, ɓiɓɓe muuɗum worɓe jeeɗiɗo nun waɗata ɗum.

¹⁵ Ginnool bonŋol toontii ɓe, wi'i: «Mii anni Yeesu, mii anni Pol, amma onon, ɓey laatiɗon?»

¹⁶ Neɗɗo gooduɗo ginnool fitti yanti ɓe, jaalii ɓe, toori ɓe faa ɓe doggi, ɓe burtorii suudu funtu, ɓee nawnii.

¹⁷ Habaru majjum sankitii hakkune *Yahuduuɓe e ɓe lenyi janani jooɗiiɓe Efesu fu. Kulol nanŋi ɓe ɓe fu, go inne Yeesu Joomiraawo teddinaa.

¹⁸ Ɗuuggal der goonɗinɓe wari tuubi, bati ko ɓe gaɗuno.

¹⁹ Ɗuuɓɓe waɗunooɓe dobo dobooje waddii dewte mum, wuli ɗe yeeso himɓe fu. Ceede majje liisaa tawaa foti ceede cardi ujunaaji lasoy ɗiɗi e sappo .

²⁰ Hande nun haala Joomiraawo sankitortoo yaago yaago, go baawɗe makka e ɓeydoo.

Fitina e siire Efesu

²¹ Ɓaawo kujje ɗee, Pol miilii tokka e Maseduwaan e Akaya o yaha *Urusaliima. O wi'i: «To mi yottake ton, sey mi yaha Roma bo.»

²² O lili wallooɓe mo ɗiɗo, Timote e Erastus, yaha Maseduwaan. Kanko, o jooɗii Asiya balɗe seɗɗa.

²³ E wakkati on, fitina mawka ummii sabbu laawol Joomiraawo.

²⁴ Bahillo gom bi'eteeɗo Demetiriyus e tafa cuuron cardi nandukon e saafirde baawɗe bi'eteeɗe Artemis. Eɗum waddana mo riiba mawka kanko e gollotooɓe makko.

²⁵ O hawriti ɓe e waɗooɓe iri golle ɗen, o wi'i ɓe: «Onon himɓe, oon anni e golle ɗee ɗo nun keɓirten nyaamdu men.

²⁶ Oon ji'a, oon nana bo no Pol majjiniri himɓe ɗuuɓɓe, hinaa der Efesu ɗo tan, e der leydi Asiya fu nun. Oo wi'a ɓe tooruuje ɗe himɓe waɗiri juuɗe mum laataaki caafeteeɗe e gooŋa.

²⁷ To eɗum yahira ninni golle meeɗen biisoto. Kanjum tan bane du, amma bo himɓe accan teddingo saafirde Artemis, tedduŋal baawɗe meeɗen mawɗe ɗe Asiya e duuniyaaru fu saafata heennyan.»

²⁸ No ɓe nani haalaaji ɗin, mone maɓɓe ummii, go ɓee bi'a e semme: «Artemis mo Efesunkeeɓe laati nun mawɗo!»

²⁹ Siire nen fu jiɓii. Ɓe fu ɓe doggani jayri fijirde. Ɓe pooɗi Gayus e Aristarkus ɓe Maseduwaan, yaaduɓe e Pol.

³⁰ Pol yiɗii naatugo hakkune jama'aare, amma goonɗinɓe haɗii mo ɗum.

³¹ Non bo woɓɓe der hooreeɓe leydi Asiya, beldiiɓe makko, lili o batee to o naatu e jayri fijirde nen.

³² Der ɗon woɓɓe e bata kaa ɗo, woɓɓe kaa to, gam jiɓe waɗii faa ɗuuɓɓe annaa ko hawriti ɗum.

³³ Woɓɓe der jama'aare fillanii gorko bi'eteeɗo Aleksandire mo *Yahuduuɓe woni e yeeƴa yeeso. Aleksandire ɓanti junŋo mum gam faamina ɓe haala kan.

³⁴ Amma no ɓe anniti o Yahuduujo nun, ɓe fu ɓee boola, faa ko waɗata janɗe ɗiɗi, ɓee bi'a: «Artemis Efesunkeeɓe laati nun mawɗo!»

³⁵ Den binnoowo mo siire nen deƴƴitini jama'aare, wi'i: «Onon Efesunkeeɓe, moy woni mo annaa siire Efesu nun woni deenoore saafirde Artemis mawɗo, kanko e foto makko janoyɗo diga kammu?

³⁶ Goɗɗo waawataa ko yeddi ɗum, gam majjum pukkinee hakkillooji mooɗon to on gaɗee huune fu e yawɗella.

³⁷ Worɓe ɓe gadduɗon ɓen, ɓe bujjay goɗɗum e saafirde meeɗen, ɓe jennay bo tooruure men.

³⁸ To Demetiriyus e gollooɓe wonduɓe e muuɗum e woodi ko ɓe jiɗi gaccoraago goɗɗo, nyalaane kiita e hiitotooɓe na'on. Ɓe noddontira kiita.

³⁹ Amma to oon goodi gokka, moƴƴinee ka der hawriine mawɓe genni.

⁴⁰ Ɓe baawan weefaago en e ko waɗi hanne, gam fitina gaɗuka ɗo walaa daliila.»

⁴¹ Ɓaawo haalaaji ɗin, o sankiti jama'aare.