Golle Lilaaɓe 17 - Bible Fulfulde Bénin New Testament

Pol e Silaasi der siire bi'eteene Tesalonika

¹ Pol e Silaasi falti Anfipolis e Apolloni, yottii Tesalonika to *waajorde *Yahuduuɓe woni.

² Pol naati der waajorde hande no woowuno. Balɗe tati *ciwteteeɗe, oo yeddontira e maɓɓe dow Dewte.

³ O faamini ɓe, o holli ɓe sey *Almasiihu tooree, fintinee e maayde. O wi'i ɓe: «Yeesu mo baajotoomi on haala muuɗum on, kanko woni Almasiihu.»

⁴ Woɓɓe e maɓɓe jaɓi ka, tokki Pol e Silaasi, nunnun bo e Yunaninkeeɓe sujidanooɓe Alla ɗuuɓɓe, e rewɓe ɗuuɓɓe tedduɓe jaɓii ka.

⁵ Nawniraagu *Yahuduuɓe ummii, ɓe kawriti wala hooreeɓe tawaaɓe e laabi, ɓe laawi siire. Ɓe jahi e wuro Yason, ɓee daarta Pol e Silaasi ɓe jaara ɗum yeeso himɓe.

⁶ No ɓe jiitay ɓe, ɓe pooɗi Yason e banniraaɓe woɓɓe faa to mawɓe genni, ɓee bata e semme ɓee bi'a: «Laawuɓe duuniyaaru ɓee, ɓe garii ɗo bo,

⁷ go Yason werni ɓe! Ɓe fu ko ɓe gaɗata e suttontiri e sariya laamiiɗo Roma, ɓee bi'a e woodi laamiiɗo goɗɗo, bi'eteeɗo Yeesu.»

⁸ Haalaaji ɗin jiɓii jama'aare e mawɓe genni.

⁹ Ɓe joofay ɓe sey no ɓe joɓini Yason e horiiɓe mum ceede.

Pol der siire bi'eteene Bereya

¹⁰ E wakkati on, jemma muuɗum banniraaɓe lildi Pol e Silaasi Bereya. No ɓe jottii, ɓe jahi *waajorde *Yahuduuɓe.

¹¹ Ɓee ton e ɓuri Yahuduuɓe wonɓe Tesalonika neɗɗaaku. Ɓe jaɓii haala kan e ɓerɗe belɗe, ɓee biɗitoo Dewte nyalaane fu, gam ɓe daara to ka Pol waajii ɓe e laatii gooŋa.

¹² Ɗuuggal maɓɓe laatake goonɗinɓe kamɓe e rewɓe Yunaninkeeɓe tedduɓe e worɓe ɗuuɓɓe.

¹³ No Yahuduuɓe ɓe Tesalonika nani Pol e waajoo haala Alla der Bereya bo, ɓe jahi, ɓe ummini ton bo himɓe, ɓe laawi jama'aare.

¹⁴ E wakkati on banniraaɓe lildi Pol o yaha far maayo, amma Silaasi e Timote kan e tawaa ɗon.

¹⁵ Ɗottuɓe Pol yaadi e makko faa Ateena. No ɓe gartata, Pol lili ɓe ɓe bata Silaasi e Timote ɓe kewtoo mo law.

Pol der siire bi'eteene Ateena

¹⁶ No Pol e hettininoo ɓe Ateena, ɓerne makko biisii sanne no o yi'i siire nen heewiri tooruuje.

¹⁷ Gam majjum o fuɗɗi oo badda e *Yahuduuɓe e hulooɓe Alla woɓɓe der *waajorde, nunnun bo e ɓe o fottata e mum nyalaane fu der jaayri to himɓe hawritintoo.

¹⁸ Janŋinooɓe woɓɓe wi'eteeɓe Epikuriiɓe e Sitoykooɓe e yeddontira e makko. Woɓɓe e wi'a: «Kaye ɗuuɗa-haalaajo oo batata?» Woɓɓe bo e wi'a: «O batanan nun saafeteeɓe jananɓe.» Ɓe batay ka maa gam haala Yeesu e pintol muuɗum o waajinoo ɓe.

¹⁹ Ɓe jaari mo to hayre bi'eteene Areyopagus , ɓe bi'i: «Emen jiɗi annugo ekkitinol kesol ŋol ekkitintaa.

²⁰ Gam a batii men haalaaji ɗi men annaa baa seɗɗa. Emen jiɗi annugo paantinol majji.»

²¹ Ɓe Ateena fu e hoɓɓe jooɗiiɓe ton waɗataa goɗɗum sey ɓee bata naa bo ɓee kettinii huune kesum.

²² Den Pol darii hakkune Areyopagus, wi'i: «Onon ɓe Ateena, mi yi'i, on himɓe diina nun sanne,

²³ gam no boosotonoomi e siire mooɗon, mi yi'ii cuuɗi caafirɗi mooɗon, mi tawii e winnaa dow hiisirde woore: ‟Saafeteeɗo mo annaaka ”. Den kan, mo caafoton ko on annaa, kanko baajotoomi on.

²⁴ Alla taguɗo duuniyaaru e ko woni e mayru fu, kanko woni joomun kammu e leydi, o jooɗataako der cuuɗi ɗi himɓe mahi.

²⁵ O bukaaka himɓe waɗana mo goɗɗum, gam kanko hokkata tageefu fu gurnam e fowtaaŋo e huune fu.

²⁶ E neɗɗo gooto Alla tagiri lenyi himɓe fu, joonni ɓe der duuniyaaru fu, o taƴani ɓe wakkatiiji e jaamanuuji e kaddi to ɓe jooɗotoo,

²⁷ Alla waɗii ɗum gam ɓe daarta mo, ɓe memitoo naa ɓe jiitan mo baa no o woɗɗidaa e goɗɗo.

²⁸ Gam der makko keɓuɗen gurnam, dimmaago e goonki, hande no yimooɓe mooɗon wi'i: ‟Enen en lenyol makko nun.”

²⁹ Gam majjum no lenyol Alla laatiɗen, haanay miilen oo nandi e tooruure gaɗiraane kanŋeeri naa bo cardi naa bo hayre, ko junŋo neɗɗo e hakkillo mum waɗi.

³⁰ Alla munyanii himɓe wakkati ɓe gonnoo e majjere. Jooni, oo ƴama himɓe fu tuuba to ɓe tawaa fu,

³¹ gam o resii nyalaane ne o hiitotoo duuniyaaru e poonnitaaki, o hiitodoo nu e neɗɗo mo o suɓi. O hollii himɓe fu ɗum laati nun gooŋa no o fintini neɗɗo on e maayde.»

³² No ɓe nani Pol e waajoo haala pintol maayɓe, woɓɓe e jaanca mo, woɓɓe e wi'a: «Men kettinante dow haala kan nyalaane wonne.»

³³ Den Pol wurtii hakkune maɓɓe.

³⁴ Amma woɓɓe tokkii mo, ɓe laatii goonɗinɓe. Der maɓɓe, bi'eteeɗo Diyonisiyus, Areyopagiijo, kanko e debbo bi'eteeɗo Damaris, e woɓɓe kade.