Golle Lilaaɓe 16 - Bible Fulfulde Bénin New Testament

Timote yaadi e Pol e Silaasi

¹ Pol yahi faa Derbe, ɓaawo mum o yottoy Listira. Aahiijo bi'eteeɗo Timote na'onno ton. Inniiko laati nun *Yahuduujo goonɗinɗo, amma baabiiko mo lenyol jananol nun.

² Banniraaɓe wonɓe Listira e Ikoniya e mana mo.

³ Pol yiɗi yaadugo e Timote, o juulni mo, gam Yahuduuɓe wonɓe ton fu e anni baabiiko mo lenyol jananol nun.

⁴ Der ci'e ɗe ɓe palti fu, ɓee jottina goonɗinɓe sariya ka lilaaɓe e *dottiiɓe wonɓe *Urusaliima resunoo ɓe tokka.

⁵ Hande nun, eklesiyaaji heɓiri semme der goonɗinki, e ɓeydoo ɗuuɗugo nyalaane fu.

Goɗɗo mo Maseduwaan der koyɗool

⁶ *Ruuhu Ceniiɗo haɗi ɓe waajaago haala Alla der Asiya, gam majjum ɓe palti e leydi Firigiya e Galaatiya.

⁷ No ɓe paanii Misiya, ɓe daarti yahugo Bitiniya, amma Ruuhu Yeesu nootaaki ɓe naata.

⁸ Gam majjum ɓe palti Misiya, ɓe jahi siire bi'eteene Torowas.

⁹ Jemmaare muuɗum Pol yi'i der kollitol Alla, gorko gom mo Maseduwaan e darii, e eela ɗum e wi'a: «Jolu, garaa Maseduwaan paaboɗaa men!»

¹⁰ No Pol hoyɗi, ɗon maa ɗon men daarti yahugo Maseduwaan, emen koolii Joomiraawo nun noddi men men baajoo ɓe *linjiila.

Pol der siire bi'eteene Filippi

¹¹ Men naati laana diyam diga Torowas, men jahi Samotaras. Fini muuɗum, men jahi Neyapolis.

¹² Men ƴiwi ɗon, men poonnii Filippi, siire arandeere der weccoore leydi Maseduwaan der jeyde Romankeeɓe. Men gaɗi ton balɗe.

¹³ *Nyalaane siwteteene, men burtii siire men jahi ley maayo, to *Yahuduuɓe woowunoo du'aago. Men jooɗii, men baajii rewɓe hawritiiɓe ton.

¹⁴ Debbo kulɗo Alla, bi'eteeɗo Liidiya, cippoowo gude boɗeeje, mo siire Tiyatira, e hettinii waaju amen. Joomiraawo maɓɓiti ɓerne makko gam o goonɗina ko Pol waajotoo.

¹⁵ Kanko e saare makko fu ɓe gaɗanaa *batisi. Ɓaawo mum o eeli men, o wi'i: «To on daarii am mii goonɗinɗo Joomiraawo, garee beeron wuro am.» O eyti men puy.

Pol e Silaasi der kasu

¹⁶ Nyalaane gom emen jahanno nokkuure to du'aare waɗetee. Korɗo debbo, gooduɗo ginnool batoowol ko warata, fotti e amen. Joomiraaɓe makko e heɓano ceede ɗuuɗɗe e dobo dobo makko.

¹⁷ O tokki men, menen e Pol, oo bata e semme oo wi'a: «Himɓe ɓee ɗo laati nun gollanooɓe Alla mo dow, ɓee baajoo on laawol kisinoowol.»

¹⁸ Balɗe ɗuuɗɗe oo waɗa nunnun faa Pol somi, yeeƴitii, wi'i ginnool ŋol: «E Inne Yeesu *Almasiihu, wurta e makko!» Ɗon maa ɗon ŋol wurti.

¹⁹ No joomiraaɓe korɗo on yi'i laawol keɓal maɓɓe maɓɓake ɓe nanŋi Pol e Silaasi, ɓe daasi ɓe faa jaayri to himɓe hawritintoo, yeeso hiitotooɓe.

²⁰ No ɓe jaari ɓe to hooreeɓe Romankeeɓe, ɓe bi'i: «Worɓe ɓee ɗo wonu wa e jiɓa siire men, ɓe laati nun *Yahuduuɓe.

²¹ Ɓee baajoo tawaaŋal ŋal daganaaki en jaɓugo naa bo tokkugo enen Romankeeɓe.»

²² Jama'aare ummanii ɓe. Hooreeɓe ɓorti kolte maɓɓe, wi'i ɓe piyee cabbi.

²³ No ɓe piyaa piiɗe naawɗe, ɓe maɓɓaa der kasu. Hooreeɓe wi'i deenoowo kasu reena ɓe no wooɗi.

²⁴ No kanko bo o bataa kaa ɗon, o watti ɓe der suudu kasu cakawol o gamii koyɗe maɓɓe e leɗɗe.

²⁵ No caka jemma waɗi, Pol e Silaasi e du'oo, e maanta Alla. Nanŋaaɓe horiiɓe e hettinanii ɓe.

²⁶ Ɗon maa ɗon leydi dimmi e semme faa daɗɗa suudu kasu ŋol dimmii. Dammuɗe fu maɓɓitii law, callalluuji nanŋaaɓe fu firtii.

²⁷ No deenuɗo fini, yi'i dammuɗe kasu e maɓɓitii, o solti tabugaahi makko o yiɗi waritaago, gam oo miili nanŋaaɓe doggii.

²⁸ Pol falmi e semme, wi'i: «Taa waɗu hoore maa ko boni, men fu men na'on ɗon!»

²⁹ O eeli jayŋol waddee, o naati e doggudu der kasu to Pol e Silaasi woni, o diccii yeeso maɓɓe, oo diwna.

³⁰ Ɓaawo mum, o wurtini ɓe, o wi'i: «Joomiraaɓe, ume gaɗanmi go mi hisa?»

³¹ Ɓe toontii mo, ɓe bi'i: «Goonɗin Yeesu Joomiraawo, a hisan, an e himɓe wuro maa.»

³² Ɓe baaji mo haala Joomiraawo, kanko e getti makko fu.

³³ Der wakkatiire jemmaare nen, o yaari ɓe, o lootoy ɓuuwe maɓɓe. Ɗon maa ɗon, o waɗanaa *batisi, kanko e saare makko fu.

³⁴ O yaari Pol e Silaasi suudu makko, o hokki ɓe nyaamdu. Kanko e himɓe wuro makko fu ɓerne maɓɓe weli sanne gam ɓe goonɗinii Alla.

³⁵ No weeti, hooreeɓe Romankeeɓe lili doogariiɓe ɓe bi'a deenoowo yoofa worɓe ɓen.

³⁶ Deenoowo batoy Pol, wi'i: «Hooreeɓe liloy joofeɗon. Jooni burtee, jawton e jam.»

³⁷ Pol wi'i: «Ɓe acci men piyaa yeeso himɓe tawi men kiitaaka, ɓe gatti men e kasu, menen Romankeeɓe. Jooni ɓe burtina men e cuuccukka na? Waɗataako! Kamɓe e ko'e maɓɓe, ɓe gara ɓe burtina men!»

³⁸ Doogariiɓe witti batoy ka hooreeɓe, go ɓe kuli no ɓe nani Pol e Silaasi laati nun Romankeeɓe,

³⁹ ko ɓe jahi, ɓe cawrinoy ɓe. Den ɓe burtini ɓe e kasu, ɓe eeli ɓe ɓe burtoo siire nen.

⁴⁰ No Pol e Silaasi wurtii e kasu, ɓe naati wuro Liidiya. Ɓe ji'i banniraaɓe, ɓe cemmiɗini ɓe. Ɓaawo mum ɓe jawti.