Golle Lilaaɓe 10 - Bible Fulfulde Bénin New Testament

No Korney tuubiri

¹ Gorko bi'eteeɗo Korney e wonnoo Kaysariya, mawɗo waalde konunkeeɓe bi'eteene Italiire.

² O laati nun kulɗo Alla, kanko e himɓe wuro makko fu ɓe kulɓe Alla. Oo sakka *Yahuduuɓe sadakaaji ɗuuɗɗi, oo du'oo wakkati fu.

³ Kiikiiɗeere gom wakkati juura, o yi'i e laaɓuɗum malaykaajo Alla naati der suudu makko, wi'i mo: «Korney!»

⁴ O fattinani mo gite sabbu kulol, o wi'i: «Joomiraawo, ume nun?» Malaykaajo on wi'i mo: «Alla jaɓanii maa du'aaje maa e sadakaaji maa, o yeggitanay maa bo.

⁵ Jooni lilu himɓe faa siire Yoppe, ɓe noddanee bi'eteeɗo Simon, innitirteeɗo Piyer.

⁶ O na'on weeri wuro kunkunɗo bi'eteeɗo Simon, mo wuro muuɗum woni takkol maayo.»

⁷ No malaykaajo baddannooɗo e makko yawti, o noddi jaggiiɓe makko ɗiɗo e soogeeru wooru kulnu Alla, takkiiɗo mo.

⁸ O fillanii ɓe ko malaykaajo on wi'i fu, den o lili ɓe siire Yoppe.

⁹ No weeti, ɓee gonii e laawol, ɓe paanii siire nen, tawi Piyer eencii dow werdude muuɗum caka nyalooma oo du'oo.

¹⁰ Rafo waɗi mo go oo yiɗi nyaamugo. No ɓe gaɗanta mo nafa, Alla holli mo ko haayni.

¹¹ O yi'i kammu maɓɓitii, go huune nandune e wudere mawne, e haɓɓaa e gawarɗe mum naay e jippoo foonnaago e leydi.

¹² Der mayre e woodi bisaaji feffeereeji ɗi koyɗe naay e ladoojum e pooli.

¹³ Daane gom wi'i mo: «Piyer, umma, hiisu, nyaamaa!»

¹⁴ Piyer wi'i: «Aawo, Joomiraawo! Abada, mi nyaamay ko harmi naa bo ko laaɓaa.»

¹⁵ Daane nen wi'i mo kade: «Taa harmin ko Alla laaɓini.»

¹⁶ Non ɗum waɗi faa laabi tati. Den wudere nen safaa dow kammu.

¹⁷ Wakkati Piyer jiɓii dow ko jiiki mum kin yiɗi wi'ugo, wakkati den himɓe ɓe Korney liloy ɓen, e ƴamana wuro Simon faa ɓe gari ley dammugal.

¹⁸ Ɓe noddi wonɓe ɗon, ɓe ƴami ɗum to ɗon nun Simon noddeteeɗo Piyer weeri.

¹⁹ No Piyer miijoto dow ko yi'i, Ruuhu wi'i mo: «Nani himɓe tato e daartee.

²⁰ Amma umma, jippa, jaahidaa e maɓɓe taa waɗu seko, gam min nun liloy ɓe.»

²¹ Piyer jippii, wi'i himɓe ɓen: «Mi nani, min woni mo daartoton. Ume waddi on?»

²² Ɓe toonti ɓe bi'i: «Korney mawɗo waalde konunkeeɓe nun liloy men. Gorko on gooŋaajo nun, kulɗo Alla, mo lenyol *Yahuduuɓe fu seedantoo geeta. Malaykaajo ceniiɗo holli mo o waɗa men gara men noddee, garaa suudu makko, gam heɓa o nana waaju maa.»

²³ Piyer naanni ɓe, werni ɓe. No weeti, o ummii, o yaadi e maɓɓe. Woɓɓe goonɗinɓe tawaaɓe Yoppe yaadi e makko.

²⁴ No weetitii, ɓe jottii Kaysariya. Tawi Korney noddiino getti e igooɓe mum ɓadiiɓe ɗum, e hettinii ɓe.

²⁵ No Piyer yottii, Korney taɓɓoy mo, diccanii mo.

²⁶ Piyer bati mo, wi'i: «Umma, gam min bo mi tagaaɗo nun.»

²⁷ Piyer e badda e makko, faa ɓe naati e suudu, ɓe tawi ton himɓe ɗuuɓɓe e hawritii.

²⁸ O wi'i ɓe: «Oon anni laawol hokkay *Yahuduujo tokkontira mo laataaki Yahuduujo, naa bo naatugo suudu muuɗum. Amma Alla hollii am to mi daaru goɗɗo tuunuɗo naa bo karmuɗo.

²⁹ Kan waɗi no lilanɗaa am, garumi, mi salaaki. Jooni, batee am, ko noddirɗon am.»

³⁰ Korney toontii, wi'i: «Hanne waɗi balɗe naay, mii du'oo der suudu am, wakkati juura ɗon maa ɗon, gorko mo gineeji jalbooji wari darii yeeso am,

³¹ wi'i am: ‟Korney, Alla jaɓanii maa du'aare maa, o yeggitanay sadakaaji maa.

³² To non lilu e siire bi'eteene Yoppe, noddaneɗaa gorko bi'eteeɗo Simon, innitirteeɗo Piyer. O na'on weeri wuro kunkunɗo bi'eteeɗo Simon, mo wuro muuɗum woni takkol maayo.”

³³ Kan waɗi lilumi law noddeɗaa. No garɗaa, a woonnii sanne. Jooni en fu en nani yeeso Alla gam kettinoɗen ko Joomiraawo batu maa baajoɗaa men.»

Waaji Piyer der wuro Korney

³⁴ Den Piyer fuɗɗi waajaago, wi'i: «Mi faamii e gooŋa Alla daaray maa himɓe fu gootum.

³⁵ Neɗɗo kulɗo mo, poonnitiiɗo, o yiɗan ɗum baa to lenyol ŋole nun o laati.

³⁶ Alla lildi ɓiɓɓe Isira'iila haala, o waajii ɓe habaru jam diga e Yeesu *Almasiihu, laatiiɗo Joomiraawo himɓe fu.

³⁷ Oon anni ko waɗii leydi Yahudiya fu, diga *Galili ɗum fuɗɗi ɓaawo Yuhaana waajii himɓe waɗee *batisi.

³⁸ Oon anni no Alla suɓiri Yeesu Nasaratuujo, no o jippiniri e makko *Ruuhu Ceniiɗo, e baawɗe, no Yeesu woositorii nokkuuje fu e golla golle booɗɗe, e nyawta wonuɓe e jeyaagu *Seyɗan fu gam Alla e wondi e makko.

³⁹ Menen men seedeeɓe ko o waɗi der leydi *Yahuduuɓe e der *Urusaliima fu. Ɓe ɓilii mo e *palaaŋal, ɓe bari mo,

⁴⁰ amma Alla fintinii mo nyalaane tatawre, hokki mo baawɗe hollitingo men hoore mum.

⁴¹ Himɓe fu bane o wirnitanii, amma seedeeɓe ɓe Alla arti suɓugo, menen nyaamduɓe e makko, yardi e makko ɓaawo pintol makko, o wirnitanii.

⁴² O yowanii men men baajoo himɓe, men ceedoo kanko woni mo Alla waɗi hiitoo wuuruɓe e maayɓe.

⁴³ Annabiiɓe fu batii haala makko, ‟wi'i goonɗinɗo mo fu heɓan yaafuye hakkeeji muuɗum sabbu inne makko”.»

Lenyi janani heɓii Ruuhu Ceniiɗo

⁴⁴ No Piyer batata haalaaji ɗi, *Ruuhu Ceniiɗo jippii dow nanooɓe waaji makko fu.

⁴⁵ *Yahuduuɓe goonɗinɓe, wardunooɓe e Piyer, haaynaa no dokkal Ruuhu Ceniiɗo sankitorii der lenyi janani bo.

⁴⁶ Gam eɓe nana himɓe ɓen e bata e ɗelle goɗɗe, e maanta Alla. Den Piyer bati, wi'i:

⁴⁷ «Himɓe ɓen heɓii Ruuhu Ceniiɗo hano meeɗen. Moy waawata ko haɗi ɓe waɗeego *batisi e diyam?»

⁴⁸ O wi'i ɓe gaɗanee *batisi e inne Yeesu *Almasiihu. Ɓaawo mum, ɓe eeli mo o jooɗodo e maɓɓe balɗe seɗɗa.