Golle Lilaaɓe 1 - Bible Fulfulde Bénin New Testament

Lilaaɓe waɗanaama alkawal Ruuhu Ceniiɗo

¹ Teyofil day, der dewtere am artirde, mi winnii ko Yeesu fuɗɗiri waɗugo e ko o waajii fu, diga o fuɗɗi golle makko,

² faa nyalaane ne o safaa dow, ɓaawo o hokki lilaaɓe ɓe o suɓi, umrooje makko, e baawɗe *Ruuhu Ceniiɗo.

³ O wirnitanii ɓe hoore makko ɓaawo o tooraa, o hollitii ɓe e laabi ɗuuɗɗi oo wuuri. O wirnitanii ɓe hoore makko balɗe lasoy ɗiɗi, oo waajoo ɓe haala *Laamaare Alla.

⁴ Nyalaane gom oo nyaamda e maɓɓe, o waajii ɓe o wi'i, to ɓe boɗɗoo e *Urusaliima, amma ɓe keɗoo alkawal ŋal *Baaba haɓɓani ɓe hande no ɓe nani o wi'uno:

⁵ «Yuhaana, diyam nun waɗirannoo *batisi, amma onon der balɗe seɗɗa, on gaɗirte batisi e Ruuhu Ceniiɗo.»

Yeesu eencii dow kammu

⁶ Hawritiiɓe ley makko ƴami mo, wi'i: «Joomiraawo, jooni nun moƴƴitintoɗaa laamaare Isira'iila na?»

⁷ Yeesu toontii ɓe, wi'i: «Ka mon bane annon jaamanuuji e wakkatiiji ɗi *Baaba waɗi e baawɗe mum.

⁸ Amma to *Ruuhu Ceniiɗo jippake e mooɗon, on keɓan semme makko, on laatoto seedeeɓe am der *Urusaliima e der leydi Yahudiya fu, e Samariya, e faa keeddin leydi.»

⁹ No o batidi haalaaji ɗin, o safaa dow, eɓe tiggitii, eɓe daara faa duule wirni mo.

¹⁰ Wakkati ɓe gonii eɓe tiggitii dow tii, tawi oo safee, worɓe ɗiɗo ɓe kaddule daneeje wari darodii e maɓɓe,

¹¹ wi'i: «Galilinkeeɓe, gam ume dariɗon, oon daara dow? Yeesu koccaaɗo e mooɗon, safaa dow kammu on, wittiraan hande no ji'irɗon oo safiree dow kammu.»

Matiyas suɓaama wattiri Yahuuda

¹² Den ɓe bittoy diga waanne bi'eteene «waanne Jaytuuje», ɓe bittii *Urusaliima. Nokkuure nen e Urusaliima waɗan kilo gootel.

¹³ No ɓe jottii, ɓe eencoy suudu dowrowol ŋol ɓe boowunoo hawritaago der mum. Lilaaɓe ɓen woni: Piyer, Yuhaana, Yaakuuba, Andere, Filippu, Toma, Bartolome, Matiye, Yaakuuba ɓii Alfee, Simon tinniiɗo gam Alla, e Yahuuda ɓii Yaakuuba.

¹⁴ Ɓe fu ɓe gaɗi hunnuko wooto, eɓe du'oo e tinnaare kamɓe e rewɓe woɓɓe, e Mariyama inna Yeesu e miiraaɓe Yeesu.

¹⁵ Der balɗe ɗen goonɗinɓe hawruɓe ɗon waɗii jaka hewre e laso. Piyer ummii, darii caka maɓɓe, wi'i:

¹⁶ «Banniraaɓe, haani ko *Ruuhu Ceniiɗo batuno der dewte diga e hunnuko Dawda hebba: O batiino haala Yahuuda, tintinɗo nanŋuɓe Yeesu laawol.

¹⁷ Gam Yahuuda laatinooɗo gooto caka meeɗen heɓii geɗu mum e golle meeɗen.

¹⁸ O soodii gesa e ceede ɗe o heɓiri e golle makko bonɗe. Ton o waritoyii, reedu makko futti, tetekki makko fu waylii.

¹⁹ Himɓe *Urusaliima fu nanii ɗum, kan waɗi ko ɓe innitiri gesa ŋaa ‟Akeldama”, der haala maɓɓe, ɗum wi'ay maa ‟gesa ƴiiƴam”.

²⁰ Gam e ɗum winnii der dewtere Jabuura: ‟Wuro makko laatoto winne, to goɗɗo jooɗoo ɗon”. Kade bo ɗum winnaama: ‟Goɗɗo hocca golle makko ”.

²¹ Sey cuɓen gooto e wonduɓe e meeɗen diga ko ɓooyi, diga Yeesu Joomiraawo wonduno e meeɗen,

²² diga Yuhaana waɗata *batisi faa nyalaane Yeesu safaa dow kammu, gam joomum laatoo seedeejo pintol makko e men.»

²³ Ɓe darni worɓe ɗiɗo: Yusufu noddeteeɗo Barsabbas, innitirteeɗo Yustus, kanko e Mattiyas.

²⁴ Ɓe du'ii, ɓe bi'i: «Joomiraawo, an annuɗo ɓerɗe himɓe fu, faamin men mo cuɓuɗaa der ɗiɗo ɓee ɗo,

²⁵ joomun etta golle e lilal ŋal Yahuuda acci yawtiri to haanani mo.»

²⁶ Den ɓe piɗani ɓe tete go Mattiyas nyaami. O hawtaa e lilaaɓe sappo e go'o ɓen.