Galaatiya 3 - Bible Fulfulde Bénin New Testament

Tokkugo tawreeta ɗum bo goonɗingo Yeesu

¹ Onon ɓe Galaatiya, on galaa hakkillo! Moy jammii on? On laaɓinanaamaa haala Yeesu *Almasiihu, tiggaaɗo dow *leggal palaaŋal.

² Toontee am ƴanɗe ɗee ɗo: Gam tokkuɗon tawreeta acci keɓuɗon *Ruuhu Ceniiɗo na, naa gam on nanii *linjiila go goonɗinɗon Yeesu Almasiihu?

³ Non hakkillo mooɗon faanɗiri? On puɗɗirii e Ruuhu Alla, ko oon jiɗi heennyitirgo e semme mooɗon?

⁴ Huune ko heɓi on ɗum fu laatike baanji na? Waɗataako ɗum laatoo baanji.

⁵ Kokkuɗo on Ruuhu mum, go e waɗa haaynaareeji hakkune mon, gam tokkuɗon tawreeta o waɗata nun na, naa gam on nanii linjiila ko goonɗinɗon?

⁶ Dewtere wi'i: «Iburahiima goonɗinii, go Alla daari mo poonnitiiɗo.»

⁷ Gam majjum, paamee kaa ɗo: Goonɗinɓe Alla nun laatii ɓiɓɓe Iburahiima.

⁸ Dewtere batiino, no Alla waɗan ɓe lenyi janani foonnitiiɓe gam goonɗinki maɓɓe. Kan acci ne batunoo Iburahiima *linjiila diga law, ne wi'i: «Lenyi fu barkiɗinte diga e maa.»

⁹ Iburahiima goonɗinii go o barkiɗinaa. Hande non goonɗinɓe heɓan barkiɗineego e makko.

¹⁰ Amma hooliiɓe tawreeta fu naaloore na'on dow maɓɓe. Gam e winnii der Dewtere: «Naaloore laatanoo mo tokkay baadey e gollira ko winnaa der tawreeta.»

¹¹ Ɗum laaɓii no baa gooto laatintaake poonnitiiɗo yeeso Alla e tokkugo tawreeta. Gam dewtere wi'i: «Poonnitiiɗo wuuran sabbu goonɗinki mum.»

¹² Nani tawreeta ƴiway e goonɗinki, gam e winnii: «Golliroowo ko tawreeta bati fu wuuran e majjum.»

¹³ *Almasiihu sooditake en diga naaloore tawreeta. O laatake naalaaɗo gam men, gam e winnii: «Ɓilaaɗo dow leggal fu laati nun naalaaɗo.»

¹⁴ Yeesu waɗii ɗum gam barke Iburahiima laatanoo ɓe lenyi janani. Goonɗinɗo Yeesu Almasiihu heɓan *Ruuhu mo Alla haɓɓani ɗum alkawal.

Tawreeta e alkawal

¹⁵ Banniraaɓe, mii bata ɗo hande no himɓe batirta. To neɗɗo haɓɓii alkawal tabbitini ŋal, walaa piirtanɗo ŋal, walaa ɓeydoowo ŋal bo.

¹⁶ Alla haɓɓanii Iburahiima e taaniraawo mum alkawal. Dewtere wi'ay: «Taaniraaɓe», hande ɓe ɗuuɓɓe nun, amma gooto ne batani, ne wi'i: «taaniraawo maa», kanko woni *Almasiihu.

¹⁷ Ko jiɗumi wi'ugo woni: Alla haɓɓi alkawal faa wooɗi. Den tawreeta garuka ɓaawo duuɓi keme naay e laso e sappo, waawataa ko fiirti ŋal, laatina ŋal baanji.

¹⁸ To donŋu heɓirte nun e tawreeta, den fu e alkawal bane ŋu heɓirtee. Nani bo e alkawal nun Alla hokkiri Iburahiima moƴƴere.

¹⁹ Den ume sariya wari waɗugo? Ka hokkaamaa gam hollitingo boofi, faa ko taaniraawo Iburahiima wara, kanko nun Alla haɓɓani alkawal. Diga e malaykaaɓe bo tawreeta hokkaa, der junŋo hakkunneejo.

²⁰ Amma to neɗɗo gooto nun, haaje hakkunneejo walaa. Nani bo Alla kan laati nun gooto.

²¹ Den, tawreeta luudontiran nun e alkawal Alla na? Aawo! To tawreeta waawanno ko hokki yonki, den fu e gooŋa neɗɗo laatinteno poonnitiiɗo diga e tawreeta.

²² Dewtere wi'i, hakke jaalake himɓe fu. To non goonɗinɓe Yeesu *Almasiihu heɓan ko ɓe kaɓɓanaa alkawal gam goonɗinki maɓɓe.

²³ Diga goonɗinki waray, tawreeta e haɓɓunoo en hande der kasu. Ekaa haɓɓi en hakko goonɗinki suppitintoo.

²⁴ Hande non tawreeta laatorii deenoowo en faa wakkati *Almasiihu wari gam laatineɗen foonnitiiɓe diga e goonɗinki.

²⁵ Jooni no goonɗinki wari, en burtake e junŋo deenoowo on.

²⁶ On fu, on laatake ɓiɓɓe Alla gam on goonɗini Yeesu *Almasiihu.

²⁷ On fu, on kawtii e Almasiihu, gaɗanaɗon *batisi e inne makko, nanduɗon mo.

²⁸ Cuttontirol walaa hakkune *Yahuduujo e Yunaninkeejo, dimo naa bo maccuɗo, gorko naa bo debbo, gam on fu on laatike gootum der kawtal mooɗon e Yeesu Almasiihu.

²⁹ To on laatike himɓe Almasiihu, den on laatike ɓe lenyol Iburahiima, on donan ko Alla haɓɓannoo mo alkawal.