Galaatiya 1 - Bible Fulfulde Bénin New Testament

Sannoore

¹ Ɗerewol ŋol ɗo ƴiwii e am, min Pol, lilaaɗo. Himɓe bane lilimmi. Lilal am ƴiway diga e neɗɗo. Amma Yeesu *Almasiihu e Alla *Baaba pintinɗo mo diga maayde nun lilimmi.

² Min e banniraaɓe wonduɓe e am fu, emen binnana on ɗerewol ŋol, onon himɓe eklesiyaaji leydi Galaatiya.

³ Baaba meeɗen Alla, e Joomiraawo meeɗen Yeesu Almasiihu, waɗana on moƴƴere, hokka on jam.

⁴ Almasiihu hokkii hoore mum gam hakkeeji meeɗen. O wurtinii en diga e jamaanuuru hallunu nu. Hande non Alla Baaba meeɗen yiɗiri.

⁵ Tedduŋal laatanoo mo faa abada. Aami.

Linjiila feereha gom walaa

⁶ Ɗum haaynake am no baylitoriɗon law, tokkuɗon *linjiila gokka, accuɗon Alla, nodduɗo on e moƴƴere *Almasiihu.

⁷ Linjiila gokka walaa. Amma himɓe nun laawata on e yiɗi waylitingo linjiila Almasiihu.

⁸ To goɗɗo waajike on linjiila feereha ka yaaday e ka men baajii on, baa to menen nun, ɗum bo malaykaajo ƴiwuɗo dow kammu nun, naaloore Alla wonoo dow joomum.

⁹ Men batiino on ka, jooni bo mii batitoo on ka: To goɗɗo waajike on linjiila feereha, cuttontirka e ka men baajii on, naaloore Alla wonoo dow joomum.

¹⁰ Den kan, fottango himɓe nun daartanmi, naa fottango Alla? Mi daartan nun mi fottana himɓe na? To mii daartanno fottango himɓe, mi laatataakono maccuɗo *Almasiihu.

No Pol laatorii lilaaɗo

¹¹ Banniraaɓe, mii yiɗi paamon no *linjiila ka baajotoomi ƴiway e neɗɗo.

¹² Neɗɗo bane hokkimmi ka, neɗɗo bane janŋinimmi ka bo, amma Yeesu *Almasiihu hollitanii am, hokkimmi ka.

¹³ On nanii no laatinoomi arande, der diina *Yahuduuɓe. Mi toorii eklesiya Alla e cattal, mi tinnakeno halkugo ka.

¹⁴ Mii ɓurunoo igooɓe am ɗuuɓɓe der laawol diina Yahuduuɓe. Mii wooduno tinnaare mawne dow saloraago tawaaŋal kaakiraaɓe am.

¹⁵ Amma Alla suɓii am diga mii woni der reedu inna am, noddimmi sabbu moƴƴere mum.

¹⁶ O hollitii am Ɓiyiiko gam mi waajoo heeferɓe habaru makko. Wakkati mum, mi seedinay goɗɗo.

¹⁷ Mi yahay *Urusaliima to artuɓe am laataago lilaaɓe, amma mi yahii leydi Arabiya, bittoymi Damas.

¹⁸ Duuɓi tati ɓaawo mum jahumi Urusaliima, gam mi annita Piyer, gondumi e makko balɗe sappo e joy.

¹⁹ Mi yi'ay lilaaɗo baa gooto, to hinaa Yaakuuba, miiraawo Joomiraawo.

²⁰ Ko binnananmi on ɗo, Alla woni seedeejo am, mi fewataa.

²¹ Ɓaawo majjum, jahumi leydi Siriya, e leydi Silisiya.

²² Wakkati majjum, goonɗinɓe ɓe eklesiyaaji leydi Yahudiya meeɗay yi'ugo am e gite mum.

²³ Ɓe nananno nun tan e wi'ee, neɗɗo toorannooɗo en, jooni na'on waajoo haala goonɗinki ki yiɗuno halkugo.

²⁴ Den ɓe teddinii Alla sabbu am.