Filemon 1 - Bible Fulfulde Bénin New Testament

Sannoore

¹ Min Pol, e banniraawo meeɗen Timote nun winni ɗerewol ŋol. Min Pol, mii laatii maɓɓaaɗo gam daliila Yeesu *Almasiihu. Emen canna Filemon, jiɗaaɗo amen, gollodintooɗo e amen.

² Emen canna bo Afiya, sakiike men debbo, e Arkippus kaɓidoowo e meeɗen gam *linjiila, e goonɗinɓe hawritintooɓe der wuro maa.

³ Alla *Baaba meeɗen, e Yeesu Almasiihu Joomiraawo, hokka on moƴƴere e jam.

Yidde e goonɗinki Filemon

⁴ Filemon, mii yetta Alla wakkati fu, mi accay siwtorgo maa der du'aaje am.

⁵ E gooŋa, mi nanii yidde e goonɗinki maaɗa dow Joomiraawo Yeesu e batanee, e no jiɗirɗaa himɓe Alla fu.

⁶ Emii eela Alla, gam goonɗinki kii ɗo hawti en yi'oo der gaɗu. Den paaminaa geetum fu ɗum baaweten waɗugo gam *Almasiihu.

⁷ Banniraawo, ɓerne am seyake puy, hakkillo am fukkake bo, gam yidde maa deƴƴitinii himɓe Alla.

Pol e sawrinana Onesimu

⁸ Mii woodi laawol der kawtal men e *Almasiihu mi eelee ko haani gaɗaa.

⁹ Amma, mii ɓuri yiɗugo, mi eelee gam yidde, min Pol *dottiijo, jooni bo mii maɓɓaaɗo sabbu Yeesu Almasiihu.

¹⁰ Mii eelee gam Onesimu ɓiyam mo keɓumi goonɗini der kasu.

¹¹ Naane, o nafayno maa, amma jooni, o nafan en, min e maa.

¹² Mii wittina mo to maaɗa, jaɓu mo hande min e hoore am.

¹³ Mii yiɗuno haggugo mo to am, gam o wallammi hande no haani balliraano am jooni no tawaami der kasu gam *linjiila.

¹⁴ Amma mi yiɗay waɗugo goɗɗum to hinaa en baddii, gam mi yiɗaa waɗingo maa booɗɗum e doole, amma ɗum laatoo e sago maa.

¹⁵ Waɗoto Onesimu seenniriino e maa wakkati seɗɗa, gam o wonda e maa, e baadey.

¹⁶ O laataaki kade maccuɗo tan, oo ɓuri maccuɗo, o laatike banniraawo men jiɗaaɗo. Min, mii yiɗi mo sanne. Mii anni aa yiɗi mo ɓuri, hinaa hande neɗɗo tan, amma hande goonɗinɗo Joomiraawo.

¹⁷ To a daarii am hande igo maa, den kan, jaɓu mo hande no jaɓirtaa am min e hoore am.

¹⁸ To o woofaniino maa, ɗum bo to o joganiino maa nyamaane, yowanam ɗum.

¹⁹ Min Pol, mii winna ka e junŋo am, mi yoɓete ɗum. Amma mii siwtoree, an bo aa joganii am nyamaane, nyamaane nen bo, an e hoore maa nun.

²⁰ An banniraawo am, waɗanam ɗum sabbu Joomiraawo, deƴƴitin ɓerne am gam kawtal men e *Almasiihu.

²¹ Mii winnanee gam mii hoolii a nananan am, gam mii anni a waɗan ɓuri ko eelu maa mi.

²² Sikan, ciriyanoɗaa am suudu to beeranmi, gam mii miila, Alla jaɓan du'aaje mon, o wittinanmi to mooɗon.

Cannooje

²³ Epafaras mo maɓɓidaami gam Yeesu *Almasiihu sanni maa.

²⁴ Marku bo, e Aristarkus, e Demas, e Luka gollidooɓe e am sannii maa.

²⁵ Moƴƴere Yeesu *Almasiihu Joomiraawo meeɗen wonda e mooɗon.