Yoube 9 - GODE EA SIA: IDA:IWANE GALA

¹ Yoube da bu adole i,

² “Ma! Na da amo sia: huluane musa: nabi dagoi. Be osobo bagade dunu da habodane Godema moloma:ne fofada:ma:bela:?

³ Osobo bagade dunu da Godema fofada:mu hamedei galebe. E da osia:i (1,000 agoane) adole ba:sea, nowa da Ema bu adole imunu dawa:ma:bela:?

⁴ Gode da asigi dawa:su bagadedafa gala amola gasa bagade gala. Osobo bagade dunu da Ema dabele sia:mu da hamedei.

⁵ E da mae sisane, goumi gaguli asili eno sogebiga ligisisa. E da ougiba:le. goumi gugunufinisisa.

⁶ Gode da bebeda:nima iasili, osobo bagade da yagugusa. Fedege agoane, E da osobo bagade golasu ifa bai amo yagugusa.

⁷ E da eso ea mabe hedofamusa: dawa:. E da gasia gasumuni ilia diga:be hou hedofamusa: dawa:.

⁸ Gode Hisu da mu hahamoi. Eno dunu da E hame fidisu. Gode hisu da hano wayabo bagade ganodini esalebe ohe bagade amo ea baligiga ososa:gisa.

⁹ Gode da gasumuni huluane muagado bugisisi. Gasumuni eno ilia dio da Bea Bagade, Olione, Bileidese, amola ga (south) gasumuni huluane.

¹⁰ Ea gasa bagade hamobe, ninia da dawa:digimu hame dawa:. Ea musa: hame ba:su hamobe da hamedafa dagomu.

¹¹ Gode da bobaligila ahoa, be na da E hame ba:sa.

¹² E da hi hanaiga liligi laha. Amola Ea logo enoga hedofamu da hamedei. Dunu huluane da beda:iba:le, Ema, “Di adi hamosala:?” amane sia:mu da hamedei ba:sa.

¹³ Gode Ea ougi hou da eso huluane dialumu. Hano wayabo bagade ohe (La:iha:be) da Godema gegei. Godema ha lai dunu da La:iha:be fuligala:i. Be Gode da ili huluane hasalasi.

¹⁴ Amaiba:le, na da habodane Godema bu fofada:ma:bela:?

¹⁵ Na da wadela:i hou hamedafa hamoi. Be Gode da na fofada:su dunu. Amaiba:le, na da logo hame gala. E da nama asigima:ne fawane, na da Ema edegemu.

¹⁶ Be E da na Ema sia:mu logo doasisia, E da na sia: nabima:bela:?

¹⁷ E da udigili na se nabima:ne, isu gibula bobodobe, na fama:ne, iasisa.

¹⁸ Ea hamobeba:le, na da mifo lamu gogolei. Ea hamobeba:le, na esalusu da da:i dioi amoga nabai gala.

¹⁹ Na da Ema sesele hamoma:bela:? Osobo bagade dunu da Godema sesemu hamedei. Na da E fofada:su diasuga oule masa:bela:? Be nowa da E amoga masa:ne sesema:bela:?

²⁰ Na da wadela:i hou hamedafa hamoi, amola dafawaneyale dawa:su hou hame fisi. Be na sia: da wadela:i hamosu dunu ea sia: agoai gala. Na sia:be huluane da nama se dabe imunu fofada:su liligi agoai ba:sa.

²¹ -

²² Na da wadela:i hou hame hamoi. Be na da da:i dioiba:le, bu hame dawa:digisa. Na da bu esalumu higa:i gala. Liligi huluane da hamedei. Gode da wadela:i dunu amola moloidafa dunu, amo defele, gugunufinisimu.

²³ Moloidafa dunu da hedolo bogosea, Gode da nodosa.

²⁴ Gode da osobo bagade amo wadela:i hou hamosu dunu ilima i dagoi. E da moloidafa fofada:su dunu huluane ilia si wadela:lesi dagoi. Gode da amo hame hamoi ganiaba, nowa da hamobela:?

²⁵ Na esalebe eso da hehenasa. Amo eso huluane da wadela:i gala.

²⁶ Na esalusu da dusagai ea hehenasu agoai gala. Na esalusu da buhiba ea ohe fonobahadi famusa:, adogomusa: hagili dabe agoane daha.

²⁷ -

²⁸ Na da se nabasu gogolema:ne, onigisia, na da bu se naba. Gode da na da wadela:le hamosu dunu dawa:sa.

²⁹ Amaiba:le, Gode da nama fofada:nanu, na da wadela:i dunu sia:beba:le, na da abuliba:le Ema dawa:ma:bela:?

³⁰ Safoga da na wadela:i hou dodofemu hamedei galebe.

³¹ Gode da na amola ledo bagade gilisili uli dogoiga ha:digi dagoi. Fedege agoane, na abula da na da:i hodo ba:sea, gogosiasa.

³² Gode da osobo bagade dunu ganiaba, na da Ema adole ia:noba. Ania da sia:ga gegei hahamoma:ne, fofada:su diasuga ahoa:noba.

³³ Be ania dogoa aligili, gaga:su dunu da hame gala. Gode amola na, anima fofada:su dunu da hamedafa.

³⁴ Gode! Nama se iabe yolesima! Na bu beda:ma:ne, maedafa hamoma!

³⁵ Na da Dima hame beda:i! Na da sia:mu! Bai na da na asigi dawa:su dawa:!