Yoube 6 - GODE EA SIA: IDA:IWANE GALA

¹ Yoube da bu adole i,

^2-3 “Na bidi hamosu da:i dioi da dioi defesu amoga defesa ganiaba, ilia defei da hano wayabo ganodini sa:i amo defei baligi ba:la:loba. Amaiba:le, na da udigili sia: dasea, mae fofogadigima.

⁴ Gode Bagadedafa E da dadi bagohame amoga na gala:i. Dadi medosu hano da na maga:me ganodini haina daha. Gode da na beda:ma:ne, se iasu bagade nama iaha.

⁵ Dougi da gisi nasea, hahawane esalebe ba:sa. Bulamagau da gisi giliga:la:i nasea, ouiya:le esalebe ba:sa.

⁶ Be dunu da ha:i manu deme hame gala, amo manu gogolesa. Amola sio oso da:iya da hame hedasa.

⁷ Na da agoai ha:i manu hame hedai agoai ba:sa. Na da ha:i manu huluane nasea, olosa.

⁸ Gode da abuliba:le na adole ba:su liligi hame iabela:? E da abuliba:le na sia:ne gadosu hame adole iabela:?

⁹ E da na medole legemu da defea gala.

¹⁰ Na da se bagade naba. Be E da na medole legemu na da dawa:i ganiaba, na da hahawaneba:le, soagalagadola:loba. Na dawa:, Gode da hadigidafa. Na da Ea hamoma:ne sia:i hamedafa hihi galu.

¹¹ Na da bu esalumu, gasa hame galebe. Na da dafawane hamoma:beyale huluane fisi dagoiba:le, abuli bu esaloma:bela:?

¹² Na da gelega hamobela:? Na da:i hodo da balasega hamobela:?

¹³ Na da nisu gaga:mu da gasa hamedafa gala. Na da fidisu dunu hamedafa gala.

¹⁴ Na da Gode Ea hou yolesi o hame yolesi, mae dawa:ma! Be amo bidi hamosu da nama doaga:beba:le, na na:iyado dunu da na hame yolesimu da defea galu.

¹⁵ Be dilia! Na na:iyado dunu! Gibu da hame dasea, hano da hafoga:i ba:sa. Amo defele, dilia da na ogogole fawane fidisa.

¹⁶ Anegagi oubiga, hano da anegagi ofo amola muge amoga ga:i dagoi ba:sa.

¹⁷ Be gia:i oubiga, amo liligi da hedolowane alalolesisa. Amasea, hano logo da hafoga:i dagoi ba:sa.

¹⁸ Sofe ahoasu dunu da hano hogobeba:le, fisi dagoi ba:sa. Ilia hafoga:i sogega doula ahoabeba:le, hedolo bogogia:sa.

¹⁹ -

²⁰ Siba amola Dima dunu fi sofe ahoasu dunu ilia da hano hogolala, be hafoga:i hano logo fawane ba:beba:le, ilia dafawaneyale hamoma:beyale dawa:i da udigili fisi dagoi ba:sa.

²¹ Na da dili ba:sea, dilia da amo hafoga:i hano logo defele ba:sa. Dilia da nama misi hou ba:sea, beda:iba:le fofogadigili bagidu gagasi ahoa.

²² Na da dilima hahawane dogolegele iasu adole ba:bela:? Na da dilima dilia na fidima:ne, eno dunuma hano suligili adole ba:bela:?

²³ Na da dilima na ha lai dunu na mae hasalima:ne gaga:musa: adole ba:bela:? Hame mabu!

²⁴ Defea! Nama olelema! Na giadofai amo nama adoma! Na da ouiya:le, dilia sia: noga:le nabimu.

²⁵ Dunu da moloidafa sia: nabasea, dafawaneyale dawa:mu. Be dilia da udigili gagaoui sia: fawane sia:sa.

²⁶ Dilia da na sia: da udigili fo agoane dawa:sa. Amaiba:le, dilia da abuliba:le na heawini da:i dioi sia: amoma adole iabela:?

²⁷ Dilia hou da agoane gala. Dilia da udigili hawa: hamosu guluba: mano lama:ne, ululuasa. Dilia da na:iyadodafa ilia liligi wamolabeba:le, bagade gagui dunu agoai ba:sa.

²⁸ Na odagi ba:ma! Na da hame ogogomu!

²⁹ Dilia sia: da gui dagoma! Moloihame hou yolesima! Nama se ima:ne mae fofada:ma! Na hou da moloidafa!

³⁰ Be dilia da na da ogogosu dunuyale dawa:be. Dilia da na da wadela:i hou amola moloidafa hou amo da hisu hame dawa:yale dawa:sala:?