Yoube 4 - GODE EA SIA: IDA:IWANE GALA

¹ Ilaifa:se da amane sia:i,

² “Yoube! Na da dima sia:sea, di da ougima:bela:? Na bu ouiya:mu hamedei ba:sa!

³ Di da dunu bagohame ilima olelesu. Di da dunu bagohame, ili gasa lama:ne fidisu.

⁴ Dunu afae da helebeba:le goaiyane didigabone dafaloba, dia sia:beba:le, e da dogo denesini, aligi.

⁵ Be wali bidi hamosu da dima doaga:i, amola di da amoga gasa fili mae aligili sidadabonei agoai ba:sa.

⁶ Di da Godema nodone sia:sa hawa: hamosu, amola dia esalusu amo ganodini dima sia:i afae hame fada:su, amaiba:le di da dia dafawane hamoma:beyale dawa:su amoga ga:nasili aligimu da defea.

⁷ Waha bu sinidigili, musa: hamosu dawa:ma! Nowa da moloidafa hou hamoi, be e da baligiliwane se nabasu ba:bela:? Agoaiwane hame ba:su.

⁸ Na da ba:loba, dunu ilia wadela:i hou fawane hawa: agoane bugimusa: dawa:lala. Be waha ilia da wadela:i hou bugi gamisu agoane gugunufinisisu hou ba:sa.

⁹ Gode da amo wadela:i hamosu dunuma ougi bagadeba:le, E da mulu bagade defele ili wadela:lesisa.

¹⁰ Wadela:i hou hamosu dunu ilia da laione wa:me agoane husa amola hagega:sa. Be Gode da ili ouiya:lesisa amola ilia bese gugulisisa.

¹¹ Ilia da laione wa:me amo da ohe fane manu hamedei ba:sa, amola ha:i manu hame galea, bogobe, amo defele bogogia:sa. Ilia da bogosea, ilia mano huluane da afagogosa.

¹² Eso afaega, sia: nama misi da ouiya:lewane nama mabeba:le, na da fada:ne hame nabi.

¹³ Amo sia: da golaiya wadela:i liligi agoai ba:beba:le amoga na da fofogadigili nedigi.

¹⁴ Na da fofogadigili, beda:ga, na da:i huluane yagugui.

¹⁵ Fo hisi da na odagia fogala:le, na da beda:ga, na dialuma hinabo afafai.

¹⁶ Na da liligi afae lelebe ba:i, be na da sosodolaligi, be amo liligi na fada:ne hame dawa:i galu. Eno liligi da ouiya:le dialebe ba:i. Amalalu, na da amane sia:be nabi,

¹⁷ “Dunu afae da Gode Ea ba:ma:ne moloidafa esalabala? Dunu afae da Osobo Bagade Hahamosu Ea ba:ma:ne ledo hamedei esalabala?

¹⁸ Gode da Hebene ganodini hawa: hamosu dunu, ilia da Ea liligi noga:le ouligima:ne hame ilegesa. E da Ea a:igele dunu amolawane ilima giadofasu hou ba:sa.

¹⁹ Amaiba:le, dia dawa:loba Gode da osoboga hamoi dunu amo Ea liligi noga:le ouligima:ne ilegema:bela:? Hame mabu! Bai osobo bagade dunu da guluga hamoiba:le, aowaba defele hedolo gagoudai dagoi ba:sa.

²⁰ Amabela:? Ninia da hahabe esalebe ba:sa, be mae daeyagili, bogoi dagoi ba:mu.

²¹ Ninia gagui huluane da bu sasamogene dagoi ba:mu. Ninia asigi dawa:su hame fada:iyawane bogosa.”