Yoube 39 - GODE EA SIA: IDA:IWANE GALA

¹ Di da goumia esalebe goudi ilia lalelegesu eso dawa:sala:? Di da sigua ‘dia’ gebo ilia mano lalelegei hou ba:bela:?

² Di da ilia eso habodayane galuiyale dawa:bela:. Di da ilia lalelegemu eso ilegei dawa:sala:?

³ Ilia habogala mano lamusa: beguduli lobo gaguladabe, amo di dawa:bela:?

⁴ Ilia da iwiladafa amo ganodini gasa lale, alesa. Ilia da ga asili, hame buhagisa.

⁵ Sigua dougi halegale masa:ne, nowa ilia logo doasibala:?

⁶ Na da ili amogai esaloma:ne, hafoga:i soge ilima i. Ilia da hafoga:i deme (sali) dialebe umiga esaloma:ne, Na logo doasi.

⁷ Ilia sia: gulubagebe moilai bai bagade gadenene hame esala. Amola dunu ilia da ili fofole amola ilia hawa: hamoma:ne sia:mu hamedei ba:sa.

⁸ Ilia goumia mola:iya:i ha:i manu hogosa.

⁹ Sigua bulamagau gawali da digili hawa: hamonesima:bela:? E da dia bulamagau diasuga gasi afae esaloma:bela:?

¹⁰ Di da sigua bulamagau gawali afaema efe gomenesili, osobo gidinama:ne sia:mu dawa:bela:? Di da e gomenesili, osobo gisuga gima:ne sia:mu dawa:bela:?

¹¹ Di da ea gasa bagade amoga e da dia hawa: hamosu fawane hamoma:ne dafawaneyale dawa:bela:?

¹² E da dia bugi gamisu dima gaguli misa:bela:? E da gagoma dia dabasu faia dialebe, amo gagadole lidima:bela:?

¹³ ‘Osadaligi’ (wida agoai) ea ougia da hedolodafa dada ahoa. Be ‘osadaligi’ afae da ‘sidoge’ ea hagili ahoabe defele hame dawa:.

¹⁴ ‘Osadaligi’ da ea oso da osobo da:iya dogoloma:ne legesa.

¹⁵ Be e da asigi dawa:su hame dawa:beba:le, amo oso da emoga hasalasimu o sigua ohe amoga goudanisimu, amo e da hame dawa:.

¹⁶ E da amo oso da ea: hameyale defele, e da hamosa. E da ea oso udigili legebayale dawa:beba:le, hame da:i diosa.

¹⁷ Be Ni fawane da e gagaoulisi, amola ema bagade dawa:su hame i.

¹⁸ Be e da muni hehenane ahoasea, e da hosi amola hosi fila heda:i dunu amoba:le ousa.

¹⁹ Yoube! Di fawane da hosi ilima gasa ibala:? Di fawane da ilima ilia mugi hinabo sedade ibala:?

²⁰ Di da ili danuba: defele soagagala:ma:ne ilima ibala:? Amola ili dunu beda:ma:ne hagogala:ma:ne hamobela:?

²¹ Hosi da nimiwane osobo fagoa gudu gigila:sa. Ilia da ilia gasa huluane defele, gegemusa: hehenasa.

²² Ilia da beda:su hamedafa dawa:. Amola gegesu gobihei afae da ili sinidigima:ne hamomu hame dawa:.

²³ Ilima fila heda:i dunu ilia gegesu liligi da ginina:ginina:sa, amola esoga baba gaga:la:sa.

²⁴ Fofogadigili yaguguli, ilia misosogane hehenasa. Gegesu dalabede da wesea, ilia da nimi agoane fofoga:sa.

²⁵ Dalabede da afae wele gasea, hosi da hagogala:sa. Ilia da gegesua hame gadeneawane, nimi gaha naba. Ilia dadi gagui ouligisu dunu ilia hamoma:ne wele sia:su naba.

²⁶ Buhiba da ea ougia ga (south) amodili da:legasea, di da hagili ahoabe amo ema olelebela:?

²⁷ Sia sio da goumi gadodafa amo da:iya bibimusa: dawa:sea, e da hidadea dia hamoma:ne sia: nabimusa: ouesaloma:bela:?

²⁸ E da igi gadodafa da:iya bibisa. Amola goumi agesone fisiagagadoi, da ea gagili sali diasu agoai gala.

²⁹ Amogainini, e da ga amola gadenene huluane liligi medoma:ne amola moma:ne hogosa.

³⁰ Sia sio ilia da bogoi da:i manusa: beba:le sisiga:sa. Waha debe sia da maga:me nososa.