Yoube 37 - GODE EA SIA: IDA:IWANE GALA

¹ Na da isu gibula bobodobe ba:sea, na dogo da gilugilusa.

² Dilia huluane! Gode Ea sia: nabima! Gugelebe amo da Ea lafidili mabe, nabima!

³ Gode da ha:ha:na diga:be muagadodili iasisa. Ha:ha:na da osobo bagade na:iyado bega: bega: ahoa.

⁴ Amasea, Gode Ea gogonomosu naba. Amo da gugelebe ea gogonomobe bagade. Amola ha:ha:na da mae fisili nene gala:lala.

⁵ Gode da sia:sea, fofogadigisu liligi da doaga:sa. Ninia da agoai liligi hame dawa:digisa.

⁶ Ea sia:beba:le, mugene da osoboga daha. Gode da gibu bagadedafa osobo bagadega iasisa.

⁷ E da dunu ilia hawa: hamosu dagolesisa. E da Ea gasa bagade hamobe ilima olelesa.

⁸ Sigua ohe fi da ilia diasuga ahoa.

⁹ Gibula bobodoi isu da ga (north) amodili maha. Anegagidafa fo da ga (south) amodili maha.

¹⁰ Gode Ea mifo da hano anegagini, ga:nasi mugene hamosa.

¹¹ Haha:na da mu mobiga nene gala:sa.

¹² Mumobi da Gode Ea hanaiga ahoa. Osobo bagade huluane ganodini, mumobi da Gode Ea hamoma:ne sia:be defele hamosa.

¹³ Gode da osobo bagadega hano soga:ma:ne gibu iaha. Eso enoga E da osobo bagade dunu ilima se dabe ima:ne gibu iaha. Amola eso enoga E da ilia hahawane ba:ma:ne, gibu iaha.

¹⁴ Yoube! Di fonobahadi ouesalu, nabima! Gode Ea noga:idafa hamobe amo dadawa:ma!

¹⁵ Gode da ha:ha:na nene gala:ma:ne sia:sa! E da habodane agoai hamosala:? Di amo dawa:sala:? E da habodane ha:ha:na mumobiga nene gala:ma:ne hamosala:?

¹⁶ Gode da fofogadigiliwane hamobela:le, mumobi da muagado gila ahoa. Di da amo mumobi ilia gila ahoabe hou ea bai dawa:sala:?

¹⁷ Hame mabu! Ga (south) dogoloi fo da soge wadela:sea, di da dogolobeba:le, se naba.

¹⁸ Gode da mu fadegale gagasea, di da E fidimu dawa:sala:? E da mu ga:nasi gula enemei defele hamosea, di da E fidimu dawa:sala:?.

¹⁹ Gode! Ninia Dima sia:mu amo Dia ninima olelema! Ninia asigi dawa:su da hame gala. Ninia sia:mu gogolesa.

²⁰ Na da Godema sia:musa: hame adole ba:mu. Bai na da abuliba:le, E na gugunufinisisima:ne logo doasima:bela:?

²¹ Wali, mu da:iya hadigi da si nenemeginana. Amaiba:le, ninia ba:mu si gasenei. Mu da foga fulaboiba:le, fofoloi gala.

²² Ninia da ga (north) la:idiga gouli agoai hadigi ba:sa. Amo da Gode E hadigi, amola amoga ninia da beda:sa.

²³ Gode Ea gasa da bagadedafaba:le, ninia da E gadenena misunu da hamedei. Ea ninima hamobe liligi huluane da moloidafa amola defele hamosa.

²⁴ Amaiba:le, dunu huluane ilia Ema beda:su hou da fofogadigisu liligi hame. E da nowa dunu da hidale, hifae da asigi dawa:su bagade lai dagoiyale sia:sea, E da amo dunu ea sia: hame naba.