Yoube 34 - GODE EA SIA: IDA:IWANE GALA

^1-2 Dilia da asigi dawa:su bagadedafa dunuse! Wali na sia:nebe amo nabima!

³ Dilia da ha:i manu naba:lalu, amo ha:i manu da noga:iyale dawa:digisa. Be bagade dawa:su sia: amo dilia nabasea, hamedafa dawa:digisa.

⁴ Be amo sia: da nini ninisu sia:sa:ili, ilegemu da defea.

⁵ Yoube hi da wadela:le hame hamoi amola ea hou da moloidafa sia:sa. Amola Gode da e da giadofale hame hamoi, amane hame sia:i, Yoube da amane egane sia:sa.

⁶ Yoube da amane adole ba:sa, ‘Na da giadofai, ogogolewane abuli sia:ma:bela:? Na da bogoma:ne fofa:gi dagoi, be na da wadela:le hame hamoi,’

⁷ Dilia dunu Yoube agoai ba:bela:? E da Gode da Mimogo Baligili Bagadedafa Dunu hame dawa:sa.

⁸ E da wadela:i hamosu dunuma gilisimu hanai, amola ili gilisili ahoana.

⁹ E da Gode Ea hanai amoga fa:no bobogesu hou da dunu hame fidisa, amane sia:sa.

¹⁰ Dilia bagade dawa:su dunu! Gode Bagadedafa da giadofale hamoma:bela:? Hame mabu!

¹¹ E da dunu ilia hamobe defele, ilima bidi iaha. Amola ilia hou hamoi defele, ilima hamosa.

¹² Gode Bagadedafa da wadela:le hamomu hamedafa dawa:. E da dunu huluane ilima moloidafa hou fawane hamosa.

¹³ Gode da Ea gasa enoma labala? Dunu eno da Ema E da osobo bagade ouligima:ne ilegebela:? Hame mabu!

¹⁴ Gode da esalusu mifo amo bu samogei ganiaba,

¹⁵ esalebe dunu huluanedafa da bogole, bu gulu dou hamona:noba.

¹⁶ Dilia da bagade dawa:su galea, na sia:be nabima!

¹⁷ Dilia da Gode Moloidafa Ema diwaneya udidisala:? E da moloidafa fofada:su higasa, dilia da dawa:sala:?

¹⁸ Hina bagade dunu amola ouligisu dunu da wadela:le hamosea, Gode da ilima se dabe ima:ne, fofada:sa.

¹⁹ E da ouligisu dunumagale hame fofada:sa. Amola bagade gagui dunu da hame gagui dunuma fofada:sea, E da bagade gagui dunumagale hame fofada:sa. Bai E da dunu huluane defele hahamoi dagoi.

²⁰ Amabela:? Ninia hedolowane gasia bogoma:bela:? Gode da nini fabeba:le, ninia da bogosa. E da asabolewane, mimogo gasa bagade dunu medole legesa.

²¹ E da ninia osa:le gagabe huluane sosodolala.

²² Gasidunasidafa da Gode mae ba:ma:ne, wadela:i dunu uligimu hamedei.

²³ Ninia huluane da Ema fofada:musa: doaga:mu. Be E da amo eso hame ilegesa.

²⁴ E da ouligisu dunu fadegale, eno dunu ilia sogebi lama:ne ilegesea, E da abodele hame ba:sa.

²⁵ Bai E da ilia hamobe huluane dawa:. E da ili fadegale, amola gasia ili banenesisa.

²⁶ E da dunu huluane ba:ma:ne, wadela:le hamosu dunugili se dabe iaha.

²⁷ Bai ilia da Ema fa:no bobogebe hou yolesili, Ea hamoma:ne sia:i huluane higa:i.

²⁸ Ilia da hame gagui dunu banenesiba:le, hame gagui dunu da Godema ili fidima:ne wele sia:i. Amola Gode da ilia wele sia:i nabi dagoi.

²⁹ Gode da fidisu hame hamoma:ne ilegei ganiaba, dunu da Ema gagabuli sia:mu da hamedela:loba. E da Ea odagi ninia mae ba:ma:ne wamoaligisu hamoi ganiaba, nini da hahanini wadela:lesi dagoi ba:la:loba.

³⁰ Gode Ea hou hame lalegagui banenesisu dunu fawane da fifi asi gala amo ouligimu ga:la:loba, amola amo fifi asi gala dunu da amo hou afadenene hamedei ba:la:loba.

³¹ Yoube! Di da dia wadela:i hou amo Godema sisane fofada:bela:? Di da Ema, dia da bu hamedafa wadela:le hou hamomu, ilegele sia:bela:?

³² Di da Godema E da dia giadofasu dima olelema:ne adole ba:bela:? Dia wadela:le hamonanebe amo yolesima:ne, Ema sia:bela:?

³³ Di da Gode Ea dima hamoma:ne sia:i amo higabeba:le, di abuliba:le E da dia hanai defele hamoma:beyale dawa:sala:? Na da hame sia:mu. Di fawane sia:ma! Wali, dia asigi dawa:su ninima adoma!

³⁴ Bagade dawa:su dunu, ilia da na sia:be defele amane dawa:mu,

³⁵ ‘Yoube e da hame dawa:beba:le, udigili hamedei sia: fawane sia:sa.’

³⁶ Yoube ea sia:i liligi huluane noga:le abodele dawa:ma. Amasea, e da wadela:i hou hamosu dunu defele sia:sa, dilia da ba:mu.

³⁷ E da ea wadela:i hamobe amoma odoga:su hou gilisisa. E da ninia midadi, Godema habosesesa.