Yoube 33 - GODE EA SIA: IDA:IWANE GALA

¹ Amola wali, Yoube! Na sia: huluane noga:le nabima!

² Na da na asigi dawa:suga liligi huluane sia:musa: momagele esala.

³ Na sia: huluane da moloidafa amola na da dafawane sia: fawane sia:mu.

⁴ Gode Ea A:silibu da na da:i hahamoi amola nama esalusu i.

⁵ Di da nama bu adole imunu defele galea, nama adole ima. Dia fofada:mu sia: amo hahamoma.

⁶ Ani galu da Gode Ea siga ba:ma:ne defele esala. Gode da ani laga osoboga hahamoi.

⁷ Amaiba:le, di da nama beda:mu bai da hame gala. Na da di hame banenesimu!

⁸ Na da nabi, di da amane sia:i,

⁹ ‘Na da hame giadofai. Na da wadela:le hame hamosu. Na da moloidafa amola wadela:i hou hame dawa:.

¹⁰ Be Gode da udigili nama doagala:musa:, logo hogosa. E da na Ea ha lai dunu defele ba:sa.

¹¹ E da na emo sia:inega la:gisa. E da na osa:le gagabe huluane ha:giwane sosodo aligisa.’

¹² Be Yoube! Na da dima sia:sa! Di da giadofai dagoi. Gode Ea hou da osobo bagade dunu huluane ilia hou baligisa.

¹³ Dia abuliba:le Gode da ninia egane sia:be amoma hame adole iaha, Ema amane diwaneya udidisala:?

¹⁴ Gode da gebewane sia:nana, sia:nana, be dunu afae da Ea sia: hame naba.

¹⁵ Gasia, dunu ilia da golasea, Gode da simasia amola esala ba:su amodili ilima olelesa.

¹⁶ Ilia da Ea sia: nabimusa:, E da ilima logesa. Amasea, ilia da Ea sisane sia: nabasea, beda:gia:sa.

¹⁷ Gode da ilia wadela:le hamosu logo hedofamusa: sia:sa. E da ili hidale agoane gasa fi hou hamosa:besa:le, ilima sia:sa.

¹⁸ E da ili gugunufinisima:ne logo hame doasimu. E da ili bogosa:besa:le gaga:sa.

¹⁹ Gode da dunu moloma:ne, olo amola da:iba:le se iasu ema iasisa.

²⁰ Olo madelai dunu, ea da magedasu hou fisisa. Ha:i manu noga:idafa ea higa:i ba:sa.

²¹ Ea da:i da udigili geloga:le, gasa dabuawane ba:sa.

²² Ea da bogoi sogega masunu gadenei ba:sa.

²³ Gode Ea a:igele dunu osea:idafa da e moloiwane hamoma:ne olelesa. Amabela:? A:igele dunu afae da amo oloi dunu fidimusa: misa:bela:?

²⁴ A:igele dunu da ema asigiba:le, amane sia:mu. ‘E masa:ne yolesima! Ea da bogoi sogega gudu hame sa:imu. Ea halegale masa:ne, dabe da wea!”

²⁵ Ea da:i hodo da bu gaheabolowane gasa fimu.

²⁶ Ea da Godema sia:ne gadosea, E da ea sia: nabimu. Ea da hahawane Godema nodone sia:ne gadomu. Gode da ea hou huluane bu hahamomu.

²⁷ Dunu afae afae, ea da odagiaba amane sisane fofada:mu, ‘Na da wadela:le hamoi dagoi. Na da molole hame hamoi, be Gode da na gaga:i.

²⁸ E da na bogoi sogega sa:imu logo amo hedofaiba:le, na da esalebe wea.’

²⁹ Gode da amo hou huluane gebewane hamonana.

³⁰ E dunu ea esalusu amo gaga:le, amola amo dunu hahawane esaloma:ne hamosa.

³¹ Wali, Yoube! Na sia:be goe nabima! Ouiya:ma! Na sia:na:!

³² Be di da sia: galea, na naba:! Di da moloidafa galea, na da dia: sia: hame gua:mu!

³³ Be amai hame galea, ouiya:ma! Amola na sia: nabima! Amola di da bagade dawa:su hou lama:ne, na da dima olelemu.