Yoube 31 - GODE EA SIA: IDA:IWANE GALA

¹ Na da uda eno mae magesa:i ba:ma:ne, Godema dafawaneyale ilegele sia:i.

² Gode Bagadedafa da ninima adi hamosala:? E da habodane osobo bagade dunu ilia houba:le dabe iabela:?

³ E da wadela:le hamosu dunuma gugunufinisisu hou amola wadela:lesisu hou iasisa.

⁴ Gode da na hamobe liligi huluane dawa:. E da na osa:le gagabe huluane ba:lala.

⁵ Na da dafawane ilegele sia:sa! Na da wadela:le hamedafa hamosu. Amola na da eno dunuma hamedafa ogogosu.

⁶ Gode da moloidafa dioi defesu amo da:iya, na adoba:mu da defea. Amasea, na hou da moloidafa, E da ba:mu.

⁷ Na da logodafa fisiagai ganiaba, o wadela:le hamomu hanai ganiaba, o na lobo da wadela:le hamoiba:le ledo hamoi ganiaba,

⁸ defea, na ha:i manu bugi da wadela:lesi dagoi ba:mu da defea, amola dunu enoga na bugi moma:mu da defea gala:loba.

⁹ Na da na na:iyado idua hanaiwane ba:i ganiaba, amola amo uda ea logo ga:su gadili wamoaligi ouesalebe ba:i ganiaba,

¹⁰ defea, na uda da eno dunu ea ha:i manu gobemu, amola e da dunu eno amola gilisili golamu da defea gala:loba.

¹¹ Nowa da agoane wadela:le hamosea, ilima se iasu da bogosu ba:mu da defea.

¹² Na da agoane wadela:i hou hamoi ganiaba, amo hou da gugunufinisisu Helo lalu defele ba:la:loba. Amola amo lalu da na gagui huluane na dagola:loba.

¹³ Musa:, na hawa: hamosu dunu ilia da nama egasea, na da ilia sia: nabalu, ilima moloidafa hamosu.

¹⁴ Na da amane hame hamoi ganiaba, na da Gode Ea midadi habodane leloma:bela:? Gode da nama fofada:musa: masea, na da Ema adi sia:ma:bela:?

¹⁵ Gode da na da:i hahamoi. Amola Ea da na hawa: hamosu dunu ili amolawane hahamoi dagoi.

¹⁶ Na da hame gagui dunu fidimusa: hamedafa hihi. Na da didalo uda ili se nabawane esaloma:ne, hamedafa yolesi.

¹⁷ Na da ha:i sadini nanu, guluba: mano ha:aligi esaloma:ne hamedafa yolesi.

¹⁸ Na esalusu huluane amoga na da amo hahani dunu noga:le ouligilalusu.

¹⁹ Na da hame gagui dunu amo da abula bidi lamu hamedei ba:loba,

²⁰ na da sibi hinabo amo na da na sibi wa:iga lai, amoga hamoi abula ema iasu. Amalalu, e da nama nodosu.

²¹ Na da fofada:su diasuga hasalimu dawa:bela:le, guluba: mano afae ema ogogole hamoi ganiaba,

²² na lobo fimu amola na ougia dagalisi dagoi ba:mu da defea gala:loba.

²³ Na da agoai hou hamomu hamedafa dawa:i. Bai na da Gode Ea se dabe imunu amoga beda:sa.

²⁴ Na da bagade gagui hou amo da bai bagadeyale hamedafa dawa:su.

²⁵ Amola na da bagade gaguiba:le, hame hidasu.

²⁶ Na da eso ea hadigi amoma nodone hame sia:ne gadosu. Amola oubi gela:gegei amoma nodone hame sia:ne gadosu.

²⁷ Na wadela:le hamoma:ne, na da ili (oubi amola eso) amoma asigi sia:musa:, na lobo nonogonanu hame oleagasu.

²⁸ Agoai wadela:i hou amoma se dabe iasu da bogosu ba:mu da defea. Amo wadela:i hou da Gode da hame esala, amo defele olelesa.

²⁹ Nama ha lai dunu da se nababeba:le, na da hamedafa nodosu. Amola gugunufinisisu hou ilima doaga:beba:le, na hame nodosu.

³⁰ Na da ili bogoma:ne, na da hamedafa wadela:le sia:ne gadoi.

³¹ Nama hawa: hamosu dunu huluane da na da eso huluane ga fi yosia:sa, amo dawa:.

³² Na da lalusu dunu na diasuga aowamusa: misa:ne sia:su. Ilia udigili logoga golasa:besa:le, na ili aowasu.

³³ Dunu oda ilia da ilia wadela:i hou wamolegemusa: dawa:. Be na da na wadela:i hou hamedafa wamolegesa.

³⁴ Na da eno dunu ilia sia:be amoga hame beda:su. Ilia gadesu hou amoma beda:iba:le, na da hame ouiya:su amola diasu gelabo ganodini hame ouesalusu.

³⁵ Dunu afae da na sia: nabima:bela:? Na da Gode Bagadedafa Ea Dioba:le ilegele sia:sa. Na sia: huluanedafa da dafawane. Gode Hi da nama adole imunu da defea. Ilia da fofada:su liligi amo nama ha lai dunu da nama fofada:nanu, amo huluane na ba:ma:ne dedene legemu ganiaba,

³⁶ na da na gida da:iya hahawane gasisalala:loba amola habuga agoane na dialuma da:iya figisila:loba.

³⁷ Na da na hamoi hou huluane Godema adola:loba, amola Ea midadi na moloi hou dawa:beba:le, na dialuma mae fili guduli, hahawane lela:loba.

³⁸ Be na da na bugili nasu soge, amo soge edadafa ilima wamolai ganiaba,

³⁹ na da ha:i manu amogai bugi mai ganiaba, amola ifabi hawa: hamosu ilima ha:i manu hame iabeba:le, ilia ha:ga bogomu logo doasi ganiaba,

⁴⁰ defea amo sogega widi amola bali mae heda:le, udigili gagalobo amola aya: gaga:nomei gisi heda:mu da defea gala:loba.” Yoube ea sia: da dagoi wea.