Yoube 30 - GODE EA SIA: IDA:IWANE GALA

¹ Be wali na afoha ayeligi dunu da nama habosesesa. Ilia eda da dunu hamedeiba:le, ilia da na wa:me amo na sibi wa:i sosodo aligimusa: fidima:ne, na da logo hame doasimu galu.

² Ilia da gasa guminisi dunu, gasa hameba:le, na hawa: hamosu hamomu hamedei ba:i.

³ Ilia da hame gagui amola ha:aligiba:le, ilia da gasia hafoga:i sogebiga, hafoga:i ifa difi gagisu.

⁴ Ilia da hafoga:i soge ifalabo liligi a:le fasili, nasu. Hame hedai ‘isu doa:su’ ifa ea difi amolawane nasu.

⁵ Dunu eno da wamolasu dunuma wele sia:ne, sefasibi defele, ilima wele sia:ne sefasi.

⁶ Ilia da magufu gelabo, gafulu ganodini dogoi, amo ganodini golasu.

⁷ Ilia da wadela:i sogega sigua ohe defele hulalu. Ilia da ifalabo haguduga gogodogagini esalusu.

⁸ Ilia da dio hamedene, hamedeidafa dunu esalu. Eno dunu ilia da sogega gadili sefasi.

⁹ Be wali ilia da misini, nama oufesega:ne habosesesa. Na da ilima oufesega:su liligi fawane gala.

¹⁰ Ilia da nama higale hamosa. Ilia da ili hou da na hou bagade baligisa dawa:. Amola ilia da misini, na odagia defo adugagala:sa.

¹¹ Gode da na gasa hame amola hahani hamoi dagoi. Amaiba:le, amo hamedei dunu da ougi bagadewane nama doagala:sa.

¹² Amo dunu wa:i da na odagiaba doagala:sa. Na iliba:le beda:ga hobeasa. Ilia da na dafawanedafa hasalima:ne ilegelala.

¹³ Ilia da na hobeamu logo hedofasa. Ilia na gugunufinisimusa:, logo hogosa. Ilia logo hedofamu dunu da hame gala.

¹⁴ Ilia da na gaga:i dobea holelesisi gelabodili nama soagalaguda:sa.

¹⁵ Na da beda:su hou amoga hasali dagoi. Na hahawane hou da hedolo fo mabe agoai, asi dagoi ba:sa. Na bagade gagui hou da mu mobi defele, asi dagoi ba:sa.

¹⁶ Na da wali bogomu gadenei galebe. Na se nabasu amo uhimu da hamedei.

¹⁷ Gasia, na gasa huluane da sesedudaha. Se da na da:iba:le gadigadidudabe da hame yolesa.

¹⁸ Gode da na abula mugia gaguli, bebenoagisisa.

¹⁹ E da na gaguli, fafua gisalugala:sa. Na hou da osobo gulu hame baligisa.

²⁰ Gode! Na da Dima wele sia:sa, be Di da nama hame adole iaha. Na Dima sia:ne gadosea, Di da na sia: hame naba.

²¹ Di da nama mae asigiliwane hamosa. Dia gasa huluane amoga nama se iaha.

²² Dia da na foga mini masa:ne, logo doasisa. Di da gibula bobodobe isu amoga, na mini laha.

²³ Na dawa:! Dunu huluane ilima misunu hou defele, Di da na bogoma:ne oule ahoa.

²⁴ Na da wadela:lesi dagoi. Di da nama asigima:ne fawane, na edegesa. Dia abuliba:le nama doagala:sala:?

²⁵ Na da bidi hamosu lai dunuma asigiba:le, dinanu. Amola hame gagui dunuma asigilalu.

²⁶ Na da hahawane hou amola hadigi hou nama misa:ne dawa:i. Be bidi hamosu amola gasi amo fawane nama doaga:i.

²⁷ Na da da:i dioi amola se nabasu amoga fawane sagodigi diala. Na da eso huluane se fawane nabala.

²⁸ Na da alaloyo amo ganodini ahoa. Na da dunu ilia odagiaba wa:legadole, fidima:ne adole ba:sa.

²⁹ Na sia: da sigua wa:me amola wida (osadaligi) ilia ga:be defele, da:i dioi amola fofagi agoai naba.

³⁰ Na gadofo da afadenene, bunumai hamoi dagoi. Na da asugiga dogolosa.

³¹ Na da musa: hahawane gesami hea:su nabi. Be wali na da disa gugulubi fawane naba.