Yoube 29 - GODE EA SIA: IDA:IWANE GALA

Yoube da ea Fofada:su Dagomusa: Sia:i

¹ Yoube da bu amane sia:i,

² Gode da musa: na esalusu noga:le ouligi. Na da bu agoane esalumu da defea galu.

³ Amo esoga, Gode da na mae fisili, ani ahoasu. Na da gasi ganodini ahoabeba:le, E da nama hadigi iasu.

⁴ Amo esoga na da bagade gaguiwane ba:i. Gode da nama dogolegeiba:le, E da na diasu amola sosogo fi gaga:i.

⁵ Gode Bagadedafa da ani esalu. Amola na mano huluane hahawane nini dafulili lelefulu.

⁶ Na bulamagau amola goudi, ilia da dodo maga:me bagade i. Amola na olife ifa ilia da igi galoase osobo da:iya noga:le heda:i.

⁷ Na moilai bai bagade asigilai dunu da sia: sa:imusa: gilisilaloba, na amola da ilima gilisi.

⁸ Ayeligi dunu da na ba:le, gasigasu. Amola da:i hamoi dunu da nama yosia:musa:, wa:legadosu.

⁹ Dunu fi ouligisu dunu da naba:le sia: ouiya:su.

¹⁰ Mimogodafa dunu da ouiya:le esalebe ba:su.

¹¹ Dunu huluane da na hou ba:beba:le, o enoga amo hou nababeba:le, ilia da na hou amoma nodone sia:i.

¹² Hame gagui dunu da digini wele sia:beba:le, na da ili fidisu. Na da guluba: mano amo da fidisu dunu hamedafa gala, ili fidi.

¹³ Dunu amo da da:i dioi bagadedafa nabi, ilia da nama nodosu. Amola uda didalo gaga:iwane esaloma:ne, na fidisu.

¹⁴ Na da eso huluane moloidafa hou fawane hamonanu.

¹⁵ Na da fedege agoane, si dofoi dunu ilia si agoai galusu, amola emo gasuga:igi dunu ilia emo agoai galusu.

¹⁶ Na da hame gagui dunu ilia eda agoai galusu. Amola ga fi da bidi hamosu ba:loba, na da ilimagai galusu.

¹⁷ Na da nimi bagade dodona:gi dunu ilia gasa wadela:lesi. Amola dunu amo da iliba:le se nabi, amo gaga:i.

¹⁸ Na da ode bagohame esalumu, amola hahawane na diasuga bogomu dawa:i galu.

¹⁹ Na da ifa amo ea difi da eso huluane hano defele naha, amola ea amoda amola lubi da eso huluane oubi baeyaga nanegasa, amo defele ba:su.

²⁰ Dunu huluane da na houba:le, nodonanusu. Na gasa da hamedafa dafamu agoai ba:su.

²¹ Na da fada:i sia:sea, eno dunu da ouiya:lewane nabasu. Ilia da na sia: dawa:iwane nabasu.

²² Na da sia: dagoloba, ilia eno sia:mu hamedei ba:su. Na sia: da gibu ea dabe agoai ba:su.

²³ Ifabi ouligisu dunu da woufo oubi gibu yosia:be, amo defele, dunu huluane da na sia: hahawane nabasu.

²⁴ Ilia da dafawane hamoma:beyale dawa:su fisi dagoi galea, na da ilia dogo denesima:ne, ilima ohomogisu.

²⁵ Na da ilima ouligisu hou hamone, ilegesu hamosu. Hina bagade da ea dadi gagui wa:i gegemusa: oule ahoabe defele, na da ili bisili oule ahoasu. Amola ilia da heawini da:i dione esalea, na da ilia dogo denesinisisu.