Yoube 28 - GODE EA SIA: IDA:IWANE GALA

Bagade Dawa:su Hou amoma Nodosu Sia:

¹ Ilia da silifa lamusa:, uli dogosa. Ilia da gouli fofoloma:ne, laluga adoba:sa.

² Osobo bagade dunu da gula lamusa:, osobo dogosa. Ilia balase lamusa:, igi goudane dadaiyasa.

³ Amo liligi lamusa:, uli dogosu dunu da gasi bagade ganodini hogosa. Ilia da oso gududafa dogone, hogosa. Ilia gasi ganodini igi lamusa: dogosa.

⁴ Dunu esalebe soge amoga badiliadafa, amola dunu ilia emoga ahoasu logoga badiliadafa, ilia da uli dogosa. Amogawi, ilisu da efe gaguiwane, uli dogoi ganodini hawa: hamonana.

⁵ Ha:i manu bugi da osoboga heda:sa. Be amo osobo haguduga, liligi huluane da gagoudai dagoi ba:sa.

⁶ Osobo bagade ea igi ganodini da sa:faia (igi noga:idafa) ba:sa. Osobo gulu ganodini, gouli dialebe ba:sa.

⁷ Sia sio da gouli uli dogoi ea logo hame ba:sa. Amola buhiba da amo gadodili hagili hame ahoa.

⁸ Laione wa:me amola eno nimi bagade sigua ohe da amo logoba:le hame ahoa.

⁹ Uli dogosu dunu da ga:nasidafa igi dogosa. Ilia da goumi ilia baiga dogonana.

¹⁰ Ilia da igi magufu ganodini dogosea, ilia da igi noga:idafa ba:sa.

¹¹ Ilia da dodogona ahoana, hano ilia banugumaga doaga:sa. Ilia wamolegei liligi amo hadigiga gaguli maha.

¹² Be bagade dawa:su hou ba:ma:ne, ninia habi hogoma:bela:? Ninia da hou noga:le dawa:digima:ne, habidili hogoma:bela:?

¹³ Bagade dawa:su hou da osobo bagade dunu ganodini hame ba:mu. Dunu huluane da bagade dawa:su hou habodayane hamedafa dawa:.

¹⁴ Dilia da hano wayabo bagade lugududafa amo ganodini, bagade dawa:su hou hame ba:mu.

¹⁵ Bagade dawa:su hou amo silifa amola gouliga bidilamu da hamedei.

¹⁶ Gouli noga:idafa amola igi noga:idafa, amo da bagade dawa:su hou ea habodayane hame defesa.

¹⁷ Bagade dawa:su hou da gouli amola gouliga hamoi faigelei amola ‘galasi’ noga:idafa amo habodayane baligisa.

¹⁸ Bagade dawa:su hou da ‘golole’ amola galasi noga:i amola ‘lubi’ igi ilia habodayane baligisa.

¹⁹ ‘Douba:se’ igi noga:idafa amola gouli noga:idafa da bagade dawa:su hou amo ea habodayane hame defesa.

²⁰ Amaiba:le, bagade dawa:su hou ea bai da habila:? Ninia da habodane amo dawa:digima:bela:?

²¹ Esalebe liligi huluane da amo ba:mu gogolesa. Sio da hagili ahoasea, amo hame ba:sa.

²² Fedege agoane, bogosu amola gugunufinisisu hou da bagade dawa:su hou fonobahadi fawane nababeba:le, noga:le hame dawa:.

²³ Gode Hi fawane da logodafa dawa:. Ea fawane da bagade dawa:su hou dialebe sogebi dawa:.

²⁴ Bai Ea fawane da osobo bagade bega: huluane amola liligi huluanedafa mu hagudu dialebe ba:lala.

^25-27 Gode da fo amoga gasa ianoba, amola hano wayabo amoma alalo sedagi ilegeloba, amola gibu ea sa:imu sogebi ilegeloba, amola mu gohona: amoma ilia masunu logo olelelaloba, amogalu E da bagade dawa:su hou ba:lalu, amola ea habodayane adoba:lalu, bagade dawa:su hou da defeadafa sia:i.

²⁸ Gode da nini osobo bagade dunuma amane sia:i, “Dilia da bagade dawa:su hou lamusa: dawa:sea, dilia Hina Godema beda:i galawane nodoma! Amo hou dawa:digima:ne, wadela:i hou fisili, Godema sinidigima!”