Yoube 22 - GODE EA SIA: IDA:IWANE GALA

¹ Ilaifa:se da amane sia:i,

² “Dunu afae da Gode fidimu hamedei. Dafawane! Baligili bagade dawa:su dunu amolawane da Gode fidimu hame dawa:.

³ Di da moloidafa hou hamobeba:le, Gode fidimu dawa:bela:? Hame mabu!

⁴ Gode da dima gagabole sia:sa amola dima fofada:sa. Be amo ea bai da di da Godema nodone beda:iba:le hame.

⁵ Hame mabu! Dima fofada:su ea bai da di wadela:i hou hamonanebe amoga hamosa.

⁶ Di da dia sama dima ea imunu muni ima:ne sesemusa:, ea abula huluane samogei. Amalalu, e da abula ga:simu hame ba:i.

⁷ Di da helebe dunuma hano hame dili i. Amola ha:aligi dunuma ha:i manu imunu higa:i.

⁸ Di da gasa bagade amola mimogo hamoiba:le, soge huluane sasamogei.

⁹ Di da didalo uda ili fidimu higa:i. Amola di da guluba: mano ilia liligi wamolai amola ilima se iasu.

¹⁰ Amaiba:le, di sa:ima:ne dogoi da di sisiga:i diala. Amola di da hedolowane beda:sa.

¹¹ Gasi da bagadeba:le, di da ba:mu gogolei. Amola hano da heda:iba:le, di hahani ba:sa.

¹² Gode da gadodafa Hebene ganodini esala. Amola gasumuni da gadodafa, be Gode da amo dabuagadonini ba:le gudusa.

¹³ Be di da amane sia:sa, ‘Gode da adi dawa:bela:? E da mu mobiga uligi. E da habodane ninima fofada:ma:bela:?’

¹⁴ E da mu da:iya gado ahoasea, E da mu mobiga uligiba:le, nini hame ba:ma:bela:? E da ba:mu!

¹⁵ Di da wadela:i hamosu dunu ilia eso huluane ahoasu logo amoga hanabela:?

¹⁶ Ilia wadela:mu ilegei eso da mae doaga:iwane, ilia da hano leda:i amoga mini asi dagoi ba:i.

¹⁷ Amo dunu ilia da Gode higasu. Ilia da Gode da ili fidimu defele esala amo dafawaneyale hame dawa:su.

¹⁸ Be Gode Hi fawane da ili bagade gagui ilima i. Na da wadela:le hamosu dunu ilia asigi dawa:su hamedafa dawa:digisa.

¹⁹ Gode da wadela:i hou hamosu dunu ilima se dabe iasea, noga:i dunu amola moloidafa hamosu dunu da hahawaneba:le oufesega:sa.

²⁰ Wadela:i dunu ilia gagui liligi huluane da wadela:lesisa. Amola hame wadela:lesi liligi dialebe, amo huluane da laluga ulagisisa.

²¹ Yoube! Di Godema olofole gousa:ma! Ema ha lasu agoane mae hamoma! Agoane hamosea, E da dima hahawane dogolegele fidisu imunu.

²² Ea dima olelebe amo lalegaguma! Ea sia: dia dogo ganodini dialoma:ne ligisima.

²³ Dafawane! Di fonoboiwane, Godema sinidigima! Wadela:i hou amo da dia diasuga hamonanebe ba:sa, amo huluane yolesima!

²⁴ Dia gouli huluane galadigima! Dia gouli noga:idafa amo hafoga:i hano logoa amogai sanasima!

²⁵ Gode Bagadedafa, E fawane da dia gouli amola silifa lelegela heda:i agoane dialoma:ne, logo doasima!

²⁶ Amasea, di da eso huluane Gode dafawaneyale dawa:mu. Amola E da dia hahawane hou ea bai dialebe, di da ba:mu.

²⁷ Di da Ema sia:ne gadosea, E da dima dabe adole imunu. Amola di da ilegele sia:sea, di da amo defele hamomu.

²⁸ Dia da, dia hamomu liligi huluane didili hamomu. Amola hadigi da dia ahoabe logo olemu.

²⁹ Gode da gasa fi gaguia gudulisisa. Amola E da asaboi dunu gaguia gadosa.

³⁰ Di da wadela:le hame hamosea, be moloidafa fawane hamosea, E da di gaga:mu.”