Yoube 12 - GODE EA SIA: IDA:IWANE GALA

¹ Yoube da amane sia:i,

² “Dafawane! Dilia da dunu huluane ilia lafi agoai gala! Dilia da bogosea, asigi dawa:su noga:idafa amolawane da bogoi dialebe ba:mu!

³ Be na asigi dawa:su da dilia asigi dawa:su defele gala. Dilia hou da na hou hame baligisa. Dilia waha sia:be amo dunu huluane ilia dawa:.

⁴ Be wali na na:iyadodafa amolawane ilia naba:le habosesele oufesega:sa. Be na hou da moloidafa amola na da wadela:le hamosu hame dawa:. Be musa:, Gode da na sia:ne gadosu nabane, adole iasu.

⁵ Dilia da bidi hamosu hame dawa:. Be dilia da nama habosesele oufesega:sa. Dilia da dunu amo da dafamu gadenei, amo fasa.

⁶ Wamolasu dunu amola Gode Ea hou hame lalegagui dunu ilia ‘gode’ da ilila: gasa fawane. Be ilia da osobo bagadega olofoiwane esala.

⁷ Be sio fi amola ohe fi da dilima olelemusa: dawa:.

⁸ Dilia osobo bagadega amola hano wayabo bagadega esalebe liligi, amo ilia da dilima olelema:ne, adole ba:mu da defea.

⁹ Ilia huluane da Hina Gode da ili hamoi, amo dawa:.

¹⁰ Gode Hi fawane da Ea hamoi liligi huluane, ilia esalusu ouligisa. Dunu huluane ilia esalusu da Ea gasaha diala.

¹¹ Be dilia! Dilia gona:su da ha:i manu ea hedai hahawane naba. Amo defele, dilia ge da udigili sia:dabe hahawane naba.

¹² -

¹³ Da:i hamoi dunu ilia da asigi dawa:su bagade gala. Be Gode da asigi dawa:su bagadedafa amola gasa bagade gala. E da Ea hawa: hamomu defele, gasa bagadedafa gala.

¹⁴ Gode da dunu ilia gagui liligi mugulusia, nowa da bu gaguma:bela:? Gode da dunu amo se iasu diasu ganodini sanasisia, nowa da amo se iasu diasu logo doasima:bela:?

¹⁵ Gode da gibu dabe logo ga:sisia, ha: bagade ba:sa. E da gibu bagade iasisia, hano da bagadewane heda:le, osobo dedebosa.

¹⁶ Gode da gasa bagade amola E da Ea ha lai dunu eso huluane hasala. Ogogosu dunu amola dunu ilima ilia ogogoi, ilia gilisili Gode Ea gasaha esalebe.

¹⁷ Gode da ouligisu dunu ilia asigi dawa:su samogesa. E da bagade dawa:su ouligisu dunu ilia hou afadenene, amasea ilia da gagaoui dunu agoai hamosa.

¹⁸ E da hina bagade dunu ilia ouligibi fadegale, ili se iasu diasu ganodini sala.

¹⁹ E da gobele salasu dunu amola gasa bagade dunu, ilia hou fonobosa.

²⁰ Osobo bagade dunu da eno dunu ilia hou dafawaneyale dawa:be. Be Gode da amo dunu ouiya:ma:ne, ilia lafi ga:sisa. E da da:i hamoi dunu ilia bagade dawa:su hou samogesa.

²¹ E da gasa bagade ouligisu dunu gogosiama:ne hamosa, amola ilia gasa bagade hou hedofasa.

²² E da gasi bagade sogebi amoga hadigi iasisa.

²³ E da fifi asi gala amo gasa bagade heda:ma:ne hamosa. Amalalu, E da amo fifi asi gala hasalasili, ili gugunufinisisa.

²⁴ -

²⁵ E da ilia ouligisu dunu gagaoui dunu agoane hamosa. Amasea, ilia da udigili doulasili, gasi ganodini adini ba:i dunu defele feloasa.