Yoube 11 - GODE EA SIA: IDA:IWANE GALA

¹ Soufa da amane sia:i,

² “Nowa da amo gagaoui sia: amoma adole ima:bela:? Di da sia: bagade sia:beba:le, bu moloidafa hamobela:? Hame mabu!

³ Yoube! Di adi dawa:bela:? Di da ninia dima adole imunu da hamedei amo dawa:sala:? Di da habosesele sia:beba:le, ninia da sia: hamedei agoane ba:mu, di da dawa:sala:?

⁴ Dia sia: da dafawane, di da sia:sa. Di da Gode Ea ba:ma:ne moloi fawane, di da sia:sa.

⁵ Na hanai da Gode Hisu da dima adole imunu da defea.

⁶ E da dima adole iabe ganiaba, E da dima Ea asigi dawa:su houdafa da osobo bagade dunu ilia asigi dawa:su bagadewane baligisa, amo adole ia:noba. Gode da dia hamobe defele, se hame iaha.

⁷ Di da Gode Ea bagadedafa hou amola gasa bagade hou huluane dawa:mu da hamedei.

⁸ Di da mu digili ba:mu gogolesa. Be Gode da mu amola liligi huluane baligisa. Gode da bogoi dunu ilia soge dawa:be. Be di da amo hame dawa:.

⁹ Gode Ea bagadedafa hou da osobo bagade amola hano wayabo bagade elea ba:de baligisa.

¹⁰ Gode da di afugili gagulaligisia, amola fofada:musa: di oule ahoasea, nowa da Ea logo hedofama:bela:?

¹¹ Gode da hamedei dunu huluane dawa:. E da ilia wadela:i hou huluane ba:lala.

¹² Sigua dougi da fofoi dougi defele lalelegesea, amo esoga gagaoui dunu da muni bagade dawa:su dunu defele ba:mu.

¹³ Yoube! Dia hou moloma! Godema sinidigima!

¹⁴ Dia wadela:i hou yolesima!

¹⁵ Amasea, di mae beda:iwane, osobo bagadega bu hahawane esaloma!

¹⁶ Amasea, di da dia bidi hamosu amo bu hame dawa:mu. Hano leda:sea, fonobahadi dialu, bu hasa. Amo defele, dia bidi hamosu wali diala, da hobea bu hame ba:mu.

¹⁷ Dia esalusu da eso dogoa digagala:be defele ba:mu. Amola dia se nabasu eso da hehebolo mabe defele ba:mu.

¹⁸ Di da gaga:iwane amola dafawane hamoma:beyale dawa:iwane esalumu. Gode da di gaga:le, dima helefisu imunu.

¹⁹ Di da dia ha lai dunuma hame beda:mu. Dunu bagohame da dia ili fidima:ne adole ba:mu.

²⁰ Be wadela:le hamosu dunu da ba:le gagale, da:i dioi fawane ba:mu. Ilia da hobeamu logo hame ba:mu. Ilia hanai da ilia hedolowane bogoma:ne fawane dawa:sa.”