Yosiua 12 - GODE EA SIA: IDA:IWANE GALA

Hina bagade Dunu Amo Mousese da Hasali

¹ Isala:ili dunu da soge amo Yodane Hano eso mabadi la:idi amo lai dagoi. Amo da Anone Fago asili Yodane Fago asili Hemone Goumia doaga:i. Ilia da hina bagade aduna fane legei.

² Afadafa da Saihone. E da A:moulaide hina bagade Hesiabone moilai bai bagadega esalu. Ea soge da Gilia:de la:idi amola Aloue (Anone Fago bega: dialu) asili Ya:boge Hano (amo hano da A:mone soge bega: alalo hamosu).

³ Amo soge ganodini, Yodane Fago (Ga:lili Hano Wayabo amoga ga asili Bedeyesimode [Bogoi Hano Wayabo amoga eso mabadi la:idi dialu] asili Bisiga Goumia doaga:i.)

⁴ Isala:ili dunu da Ba:isa:ne hina bagade amo Oge fane legei. Oge da fi Lefa:ime (gadenene ebelei fi) dunu. E da A:siadalode amola Edeliai ouligi.

⁵ Ea ouligisu soge ganodini da Hemone Goumi, Sa:lega amola Ba:isa:ne soge (amo da asili Gise amola Ma:iaga alaloga doaga:i) amola Gilia:de la:idi (eno la:idi Hesiabone hina bagade Saihone da gagui), amo soge ba:i dagoi.

⁶ Mousese amola Isala:ili dunu da amo hina bagade aduna fane legei dagoi. Hina Gode Ea hawa: hamosu dunu Mousese da ela soge amo Liubene fi, Ga:de fi amola eso mabadi la:idi Ma:na:se fi ilima i dagoi.

Hina bagade Dunu amo Yosiua Da Hasali

⁷ Yosiua amola Isala:ili dunu da hina bagade huluane soge amo Yodane Hano ea eso dabe la:ididili esalebe, amo fane legei dagoi. Amo soge da Ba:ia:la Ga:de (Lebanone Fagoga galu) amoga ga asili Ha:ila:ge Goumi alaloga doaga:i. Yosiua da amo soge fifili, Isala:ili dunu eso huluane gaguma:ne, ilima i.

⁸ Amo soge ganodini, agolo soge, eso dabe agolo fonobahadi soge, Yodane Fago, ea agolo, eso mabadi goumi soge amola ga (south) dialebe hafoga:i soge ba:i. Amo soge ganodini, musa: da Hidaide, A:moulaide, Ga:ina:naide, Belesaide, Haifaide amola Yebiusaide dunu esalebe ba:i.

⁹ Isala:ili dunu da moilai bai bagade hagudu dedei ilia hina bagade hasali, amo,

¹⁰ Yelusaleme amola Hibalone,

¹¹ Yamade amola La:igisi,

¹² Egelone amola Gise,

¹³ Dibe amola Gide,

¹⁴ Homa amola A:ila:de,

¹⁵ Libina amola Adala:me,

¹⁶ Ma:gida amola Bedele,

¹⁷ Da:bua amola Hife,

¹⁸ A:ifege amola La:sa:ilone,

¹⁹ Ma:idone amola Ha:iso,

²⁰ Similone Milone amola Agasa:fe,

²¹ Da:ianage amola Megidou,

²² Gidese amola Yogeniame (Gamele soge ganodini),

²³ Do (wayabo bagade bega:) amola Gouimi,

²⁴ amola Dusa. Huluane ilia da hina bagade31 agoane hasali.