Soloumane ea Gesami 7 - GODE EA SIA: IDA:IWANE GALA

¹ “Di da a:fini ida:iwanedafa. Dia emo, dia emo salasu ganodini da isisima:goi ba:sa. Dia masele dalegala:i da fedege liligi hahamosu dawa:dui dunu ea hamosu defele gala.

² Dia semogofo da ononoi faigelei waini hanoga nabane, ebelemu da hamedei agoane ba:sa. Dia bulu ga:su da widi dabosu amo ‘lili’ mosoi amoga bului agoai ba:sa.

³ Dia dodo da ‘dia’ ohe aduna lalelegei amola ‘gasele dia’ aduna agoane ba:sa.

⁴ Dia galogoa da ‘aifoli’ diasu sedade gagagula heda:i agoane ba:sa. Dia si elea da hano wayabo Hesiabone moilai bai bagade amo ea logo holei gadenene diala, agoai ba:sa. Dia mi da Lebanone diasu sedade gagagula heda:i amo da Dama:sagase moilai bai bagadega, sosodo aligisu dunu amo moilai ouligimusa: esaloma:ne gagui, agoaiwane noga:idafa ba:sa.

⁵ Gamele Goumi da gadodafa agoai, di da dia dialuma gadoba:le gadole ahoa. Dia dialumasa da ‘sa:dini’ abula ea ela:mai agoai ba:sa. Ea isisima:goi da hina bagade gagulaligimu defele gala.

⁶ Di da isisima:goidafa! Dia noga:idafa sasagesu hou amo da dunu gumima:ne agoane hamosa.

⁷ Di da gumudi ifa agoane, da:da:lole ahoa. Dia dodo da dadi fage sosogoi agoane ba:sa.

⁸ Na da dadi ifaba:le heda:le, ea fage faimu. Na da dia dodo waini fage sosogoi agoai ba:sa, amola dia mifo amo ‘a:bele’ fage ea gabusiga: defele gala.

⁹ Amola dia lafi da baligili noga:i waini defele gala.” Uda da amane sia:sa, “Defea! Amo waini hano da moloiwane na sasagesu dunu masunu da defea. Waini hano da ea lafi amola ea bese amodili musa:le sa:imu da defea.

¹⁰ Na da na sasagesu dunu ea:. Amola e da na hanasa.

¹¹ Na dogolegei! Misa! Ani da hamega gadili amoga asili, diasu gilisisu fonobahadi amo ganodini gasi afae golamu.

¹² Ani da hahabedafa wa:legadole, waini efe sagai muni, heda:bayale amola sogea da falegabeyale, amola ‘bomegala:nidi’ ifa sogea heda:bayale abodemu. Amogawi na da dima sasagesu imunu.

¹³ Di da ‘ma:nadala:ige’ ea gabusiga: noga:idafa nabimu. Amola fage noga:idafa ania logo ga:su gadenene ligi dialebe ba:mu. Na dogolegei! Na gaheabolo amola hea hahawane hamosu amo dima imunusa: modai diala.