Soloumane ea Gesami 6 - GODE EA SIA: IDA:IWANE GALA

¹ “Saga! Baligili noga:i ba:su uda! Dia sasagesu da habidili asibala:? Ninia di fidili hogole ba:musa:, ea asi logo ninima adoma.” Uda da amane sia:i,

² “Na sasagesu dunu da ea ifabia (amogawi ‘bolosame’ ifa da heda:la) amoga asi dagoi. E da amogawi ea sibi wa:i amoma ha:i manu iana amola ‘lili’ mosoi gagadolala.

³ Na sasagesu dunu da na:. Amola na da ea:. E da ‘lili’ bugi amo ganodini ea sibi wa:i amoma ha:i manu iana.” Dunu da amane sia:i,

Gesami Bi

⁴ “Na dogolegei! Di da Yelusaleme moilai bai bagade amola Disa moilai bai bagade defele, noga:idafa ba:sa. Dunu da amo moilai bai bagade ela hahalogoboi ba:sea, fofogadigiba:le, habe ha:sa. Amola dia isisima:goi ba:sea, agoaiwane hamosa.

⁵ Dia si hamega ba:legama! Dia si da na gagulaligisa! Dia dialuma hinabo da goudi wa:i amo da Gilia:de agologa soagagala: ahoa agoane giginisa dabe ba:sa.

⁶ Dia bese da sibi amo da hinabo waha dodofei agoane ba:sa. Afae da hame gumi ba:sa. Ilia huluane da defele dadalei ba:sa.

⁷ Dia ba: da dia odagi dedebosu abula baligiadili da nenemegisa.

⁸ Defea! Hina bagade da uda 60 lamu da defea. Amola gidisedagi uda 80 amola uda afini idimu hamedei lamu da defea.

⁹ Be na da afae fawane ni dogolegesa. Amola amo da ‘dafe’ sio defele, isisima:goi ba:sa. E da ea:me ea dogolegei uda mano afae fawane gala. Uda huluane ema ba:le nodone sia:sa. Hina bagade uda ilia, amola gidi sedagi uda ilia da e nodoma:ne gesami hea:sa.

¹⁰ Amo da nowala:? Ea ba:la ahoabe da eso mabe agoai ba:sa. E da isisima:goi amola hadigi. E da eso amola oubi agoai, si nenemegini, ba:mu gogolei.

¹¹ Na da ‘amode’ ifa bugi bobodole ganodini amo nono heda:i amola lubi gaheabolo efega lai amola ‘bomigala:nidi’ ifa amo ea mosoi ba:la misi dagoi.

¹² Na da yagugubi. Sa:liode genonesisu dunu da gegemusa: hanai gala, amo defele na da dima sasagesu hou hamomu hanai.” Yelusaleme uda ilia da amane sia:i,

¹³ “Siogoma! Siulame uda a:fini! Di siogoma! Ninia ba:musa:, dia siogoma!” Uda da amane sia:i, “Na da la:idi amola la:idi dadalele lefulubi dunu dogoa siogosea, dilia abuliba:le na ba:musa: hanabela:?”