Soloumane ea Gesami 2 - GODE EA SIA: IDA:IWANE GALA

¹ Na da soge ale ifa mosoi Sia:lane sogega bugi agoai. Amola na da ‘lili’ mosoi goumi fago ganodini aligi agoai.” Dunu da amane sia:sa,

² “Na dogolegei! Di da uda gilisisu amo ganodini, ‘lili’ mosoi noga:iwane, aya: gaga:nomei gigisi ganodini agoai ba:sa.” Uda da amane sia:sa,

³ “Na dogolegei da dunu eno gilisi amoga ‘a:bele’ ifa noga:i amo iwilaga aligi ifa ganodini bugi agoai ba:sa. Na da ea baba ganodini fimusa: hanai gala. Amola ea fage legei da nama hedaidafa gala.

⁴ E da na ea lolo nabe diasuga oule misi. Amola e da ea gosagisu abula amo na dedeboma:ne, hiougili gadoi. Ea gosagisu da sasagesu hou.

⁵ Na da bu gasa lama:ne, hafoga:i waini fage nama ima. Na bu obeagima:ne, ‘a:bele’ fage nama ima. Na da sasagesu hou ha:giwane hamobeba:le, gasa hamedei gala.

⁶ Ea fofadi lobo da na dialumaha diala, amola ea lobodafa da na sogoba:le nonogosa.

⁷ Yelusaleme uda, dilia! Hehenasu ‘dia’ gebo amola ‘gasele dia’ gebo ilia houba:le, sia: dafawaneyale ilegema. Ania sasagesu gilisili fibi hou mae hedofama:ne sia:ma!” Uda da amane sia:i,

Gesami Ageyadu

⁸ “Na da na sasagesu dunu ea sia:be naba. E da goumi da:iya giadofale hehenaiya manebe. E da agolo da:iya giadofale nama manebe.

⁹ Na sasagesu dunu da ‘gasele’ dia agoai ba:sa. E da waha debe ‘dia’ gawali agoai gala. E da dobea fei bega: aligisa. E da fo logo agei gelabodiliaga ba:sa. E da ifa gigiadomai gelabodiliaga ba:sa.

¹⁰ Na sasagesu dunu da nama sia:sa.” Dunu da amane sia:i, “Na dogolei! Misa! Ani ahoa:di!

¹¹ Anegagi oubi da yolei. Gibu amola da yolei.

¹² Sogega mosoi da falegai dagoi. Wali da gesami hea:su esoha. Moifufui amoga ‘dafe’ sio da gesami hea:lala.

¹³ Figi fage da muni yosa. Efe mosoi da falegabeba:le, hisi da gabusiga: agoai naba. Na dogolegei! Misa! Ani ahoa:di!

¹⁴ Di da ‘dafe’ sio amo da igi bagade gouda:i gala:i adobo amo ganodini wamoaligisa agoane ba:sa. Dia odagi noga:idafa, na da ba:ma:ma. Dia sia: noga:idafa na da nabima:ma.

¹⁵ Fogisi wa:me da waini sagai sogea heda:i amo wadela:lesisa:besa:le, ili seba:ma.” Uda da amane sia:i,

¹⁶ “Na sasagesu dunu da na:. Amola na da ea:. E da ea sibi wa:i amo ‘lili’ bugiga ha:i manu ianeawane,

¹⁷ hahabe fo da fulabosea amola gasi da alalolesi ba:sea fawane yolesisa. Na dogolegei! Buhagima! ‘Gasele dia’ ohe agoane amola ‘dia’ gawali amo da Bidia goumi alelaloi amoga esala agoane, buhagima.