Gesami Hea:su 97 - GODE EA SIA: IDA:IWANE GALA

Gode da Ouligisu Dunu Bagadedafa.

¹ Osobo bagade, hahawane nodoma! Hina Gode da Hina Bagadedafa! Hano wayabo bagade ganodini oga dialebe gala! Dilia da nodoma!

² Mu mobi amola gasi da E sisiga:sa. E da moloidafa amola moloidafa fofada:su amoga ouligisa.

³ Lalu da Ea midadi bisili ahoana, Ema ha lai dunu E sisiga:le aliligi amo nene ahoa.

⁴ Ea da:gini gala:be amoga osobo bagade huluane da digaga:la:sa! Amola osobo bagade da amo ba:sea yagugusa.

⁵ Agolo huluane da osobo bagade Hina Gode Ea midadi gamali ulagisia daeane dabe agoai ba:mu.

⁶ Hebene da Ea moloidafa hou amo olelesa, amola fifi asi gala huluane da Ea hadigi amo ba:sa.

⁷ Ogogole ‘gode’ huluane da Hina Gode Ea midadi begudusa, amaiba:le dunu huluane ogogole ‘gode’ ilima nodone sia:ne gadobe da gogosiasu fawane ba:mu.

⁸ Hina Gode! Saione fi dunu amola Yuda moilale gagale fi dunu da hahawaneba:le nodosa. Bai Dia fofada:su hou da moloidafa.

⁹ Hina Gode Bagadedafa! Di da osobo bagade fifi asi gala huluane Ouligisudafa. Di da ogogole ‘gode’ amo huluane baligi dagoi.

¹⁰ Hina Gode da nowa da wadela:i hamosu amo higabe, ilima nodosa. E da Ea dunu ilia esalusu amo gaga:sa. Wadela:i hou hamosu dunu ilia gasa amoga Ea fi dunu wadela:lesisa:besa:le, E da ili gaga:sa.

¹¹ Hadigi da moloidafa dunu amodili diga:sa. Amola hahawane hou da noga:i dunu amodili diga:sa.

¹² Molole hamobe dunu dilia huluane da Hina Gode Ea hahamobe hou amo dawa:le, hahawane ba:ma! Hadigi Gode Ea hamobe bu dawa:ma amola Ema nodone sia:ma!