Gesami Hea:su 92 - GODE EA SIA: IDA:IWANE GALA

Nodone Gesami Hea:su

¹ Hina Gode Baligili Gadodafa, Dima nodone sia:mu amola Dima nodone gesami hea:mu da defeadafa.

² Dia mae fisili asigidafa amo eso huluane hahabe sia:nanumu da defea, amola Dia didili hamosu hou amo gasia huluane sia:nanumu da defea.

³ Sani baidama amola baidamadafa, amoga dusa, Dima nodonanumu da defea.

⁴ Hina Gode, Dia baligili bagadedafa hamobe hou amoga na da nodosa, amola Dia hahamoi liligi amo ba:beba:le, na da nodone gesami hea:sa.

⁵ Hina Gode, Dia hahamobe liligi da bagadedafa! Dia dawa:su da oso dogoidafa gala!

⁶ Goe hou da gagaoui dunu, amo ea da dawa:mu gogolei,

⁷ Wadela:i hamosu dunu da wadela:i gisi agoane heda:mu, amola giadofale hamosu dunu ilia da liligi bagade gagui dialebe ba:mu, be amomane ilia da bagadedafa gugunufinisi ba:mu.

⁸ Bai Hina Gode da Gadodafa amola Fifi Ahoanusudafa.

⁹ Ninia dawa:, Dima ha lai dunu ilia da bogogia:mu, amola wadela:i hou hamosu dunu da hasalasi dagoi ba:mu.

¹⁰ Di da bulamagau sigua amo ea gasa defele nama gasa i, amola Di da hahawane dogolegele hou nama hamoiba:le, na da hahawane bagade.

¹¹ Na da nama ha lai ilima hasalasibi amo ba:i amola wadela:i hou hamosu dunu ilia didigia:be amo nabi.

¹² Molole hamosu dunu ilia da gumudi dulu waha faselale salabe agoai ba:mu. Ilia da Lebanone soge ganodini dolo ifa heda:be agoai ba:mu.

^13-14 Ilia da ninia Hina Gode Ea Debolo diasu ganodini bugi ifaga osomo falegabe agoai, amo da yalo idalo hamone, gebewane lubi dialuli fage legelalebe, gasa bagade ifa agoai ba:mu.

¹⁵ Amoga ninia ba:sea da Hina Gode da moloidafa olelesa. E da na Gaga:su gala. Amola Ea hou amo ganodini, giadofale hamobe hamedafa ba:sa.