Gesami Hea:su 85 - GODE EA SIA: IDA:IWANE GALA

Isala:ili Fifi Asi amo Noga:le Ouligima:ne Sia:ne Gadosu

¹ Hina Gode, Di da Dia soge amoma asigi hou hamoi, amola Di da Isala:ili bu noga:le hahamonesi.

² Di da Dia dunu ilia wadela:i hou gogolema:ne olofoi dagoi, amola ilia wadela:i hou huluane gogolema:ne olofolesi dagoi.

³ Di da ilima ougisu amo yolesi dagoi, amola gasa bagade nimi hou amo Di guminisi dagoi.

⁴ Nini gaga:su Gode, nini bu oule sinidigima, amola ninima hahawane hame ba:su amo yolesima!

⁵ Di da mae yolele ninima gebewane ougi dialoma:bela:? Dia ougi da mae gumini gebewane dialoma:bela:?

⁶ Nini bu gasa filisima, amola Dia fi dunu ninia da Dima nodone sia:nanumu.

⁷ Hina Gode, Dia mae fisili asigidafa hou amo ninima olema, amola Dia nini fidili gaga:ma.

⁸ Na da Hina Gode Ea sia:be amo nabala. E da Ea fi dunuma hahawane olofosu hou amo imunusa: ilegele sia:sa, be amo da ninia musa: gagaoule hamonanusu hou amoga hame buhagisia,

⁹ E da dafawanedafa Ema nodone sia:be dunu amo gaga:musa: momagele ouesala, amola Ea gaga:su hou da ninia soge amo ganodini dialumu.

¹⁰ Asigi hou amola didili hamosu hou da ela disimu! Moloidafa hou amola olofosu hou da ela yosia:mu.

¹¹ Dunu ilia madelagisu hou da osoboga gudunini gado heda:mu, amola Gode Ea moloidafa hou amo da fedege agoane Hebenega gadonini gudu ba:legudumu.

¹² Hina Gode da nini bu noga:le hahamonesimu amola ninia soge da ha:i manu noga:le heda:mu.

¹³ Moloidafa hou da Hina Gode Ea midadi bisili, E misa:ne logo fofodola masunu.