Gesami Hea:su 83 - GODE EA SIA: IDA:IWANE GALA

Isala:ilima ha lai Fi Hasalasima:ne Sia:ne Gadosu.

¹ Gode, Di ouiya:le mae dialoma! Di hamedigili mae dialoma! Mae ouiya:ma!

² Ba:ma, Dima ha lai dunu da dodona:gi bagade, amola Dima higa:i dunu da Dima odoga:sa.

³ Ilia da Dia dunu fi ilima hamomusa: sia: wamo ilegesa! Ilia da Dia gaga:i dunu fi amo wadela:lesimusa: wamo sia: ilegesa.

⁴ “Misa!” ilia da sia:sa. “Ninia da ilia fifi asi amo wadela:lesila:di, amasea, Isala:ili da gogolesa, gogoleidafa dialoma:ne.”

⁵ Ilia da ilia hamomusa: ilegei amo hamomusa: sia:nu amola Dima didili hamomusa:, eno dunuma gilisisa.

⁶ Idome fi dunu amola Isiama:iele fi dunu, Moua:be fi dunu amola Ha:galaide fi,

⁷ Giba:le, A:mone amola A:malege fi dunu, amola Filisidini amola Daia fi dunu.

⁸ Asilia fi amolawane da ilima madelale amola gasa bagade fili, A:moulaide amola Moua:be (Lode egaga fi) ilima gilisisa.

⁹ Di da Midia:ne fi amola Sisela amola Ya:bini ilima Gisione Hanoga hamoi, amo defele ilima hamoma.

¹⁰ Di da ili Enedo sogebia hasalasibiba:le, ilia da:i hodo da osobo da:iya dasale sa:i.

¹¹ Di Olebe amola Sibe, elama hamoi defele, ilia bisilua amo ilima hamoma. Di da Siba amola Sa:lamouna hasalasi defele, ilima hamoma.

¹² Elea da amane sia:i, “Ania da Gode Ea Soge amo anigili lamu.”

¹³ Gode! Gulu defele ili dudulisima! Widi gisi bioi defele foga mini masa:ma.

¹⁴ Lalu da iwila soge nesea, lalu gona:su da agolo soge amo madelala asili, nene ahoa.

¹⁵ Amo defele, wadela:i hou hamosu dunu Dia gasa bagade mulu amoga sefasima! Amola Dia gasa bagade fo amoga ili beda:ma:ma.

¹⁶ Hina Gode! Ilia odagi amo gogosiasuga dedebosima, amola Dia gasa bagade hou amo dawa:digima:ma.

¹⁷ Ilia da mae fisili eso huluane, hasalasu amola beda:su bagade fawane ba:mu da defea. Ilia da dafawane gugunufinisi galea fawane bogogia:ma:ma.

¹⁸ Difawane da Hina Gode, amo ilia dafawane dawa:ma:ma! Amola Difawane da osobo bagade amo ganodini Ouligisudafa amo ilia dawa:ma:ma.