Gesami Hea:su 81 - GODE EA SIA: IDA:IWANE GALA

Lolo Nasu Gesami Hea:su

¹ Ninia Gaga:su Hina Gode Ema nodone wele sia:ma! Ya:igobe ea Gode Ema nodone gesami hea:ma!

² Ilibu muni ba:gu da la:idi la:idi figi amoga duma. Noga:le hanai nabima:ne, ilibu amola sani baidama duma.

³ Lolo nasea, oubi da genoni aligila heda:i lelea amola oubi da ufa manea, dalabede fulaboma.

⁴ Amo da Isala:ili fi ganodini sema agoane hamoi, amola amo Ya:igobe ea Gode Hi hamoma:ne sia:i.

⁵ Gode da Idibidi soge amoma doagala:loba, E da amo hamoma:ne sia:i Isala:ili dunu ilima iasi. Na da Dia hame dawa: sia: amoga agoane sia:be nabala,

⁶ “Na da dilia baligia dioi dialu amo fadegale fasi. Na da osoboga hamoi igi dilia gaguli ahoasu amo ligisima:ne logo doasi.

⁷ Dilia da dilima bidi hamosu doaga:beba:le Nama wele sia:i, amola Na da dili gaga:i. Na da Na wamoaligisu soge mulu amo ganodini esala, dia sia: amoma dabe sia:i. Na da Meliba guhano amoga dilima adoba:su hamoi.

⁸ Na dunu, Na sisa:ne sia:be amo nabima. Isala:ili fi! Abuli hamone Na sia: nabima:bela:?

⁹ Dilia da eno Godema maedafa nodone sia:ne gadoma.

¹⁰ Na da dilia Hina Gode. Dili Idibidi soge ganodini esaloba, Nisu da dili fadegai. Dilia lafi dagale gama, amasea Na da diligili ha:i manu mugusimu.

¹¹ Be Na dunu ilia da Na sia:be hame nabi. Isala:ili ilia da Na sia:be didili hame hamoi.

¹² Amaiba:le, Na da ilisu gasa fi hou hamonanoma:ne yolesi, amola ili hanai hamoma:ne yolesi.

¹³ Abuli hamone Na fi dunu ilia da Na sia: nabima:bela:, abuli hamone ilia da Na sia: didili hamoma:bela:?

¹⁴ Ilia da agoai hamomu ganiaba, Na da hedolowane ilima ha lai dunu ili hasalasila:loba, amola ilima ha lai dunu huluane ilima gasa fili hasalasila:loba.

¹⁵ Nama higale ba:su dunu ilia da beda:iba:le, na midadi dialuma fili begudumu. Ilima se bidi iasu da maedafa yolele, gebewane dialumu.

¹⁶ Be amomane Na da dilima widi ha:i manu ianumu amola na da dili sadima:ne soge agime hano moma:ne imunu.”