Gesami Hea:su 8 - GODE EA SIA: IDA:IWANE GALA

Gode Ea Hadigi Hou amola Osobo Bagade Dunu ilia Hou Defele Gala

¹ Hina Gode! Ninia Hina Gode! Osobo bagade fifi asi gala huluane da Dia gasa bagade hou ba:lala. Dima nodosu hou da heda:le, muagadodafa amoga doaga:sa.

² Mano amola mano dudubu da Dima nodosu gesami hea:sa. Dima ha lai da Di wadela:mu da hamedei. Di da Dima ha lai dunu amo ilia Dima doagala:mu logo hedofasa.

³ Di da mu hahamoi dagoi amola oubi amola gasumuni huluane, Di da ilia sogebi amoga bugisi. Amo liligi huluane na ba:sea, na bagadewane agoane dadawa:sa,

⁴ osobo bagade dunu da hamedei liligi agoane gala. Amaiba:le, Di, Hina Gode, da abuliba:le osobo bagade dunuma bagadewane dadawa:sala:? Abuliba:le, Di da osobo bagade dunu asigiwane ouligisala:?

⁵ Be Di da osobo bagade dunu amo gaguia gadole, ilia da Di hagudu fawane esaloma:ne hamoi. Di da osobo bagade dunu ilima hadigi hou i dagoi. Amola, Di da eno liligi huluane da ilima nodoma:ne, Di da osobo bagade dunu gaguia gadoi.

⁶ Dia da osobo bagade dunu ilia da liligi huluane Dia hamoi amo ouligima:ne ilegei dagoi.

^7-8 Dia da osobo bagade dunu ilia da sibi, bulamagau, sigua ohe huluane, sio fi, menabo fi amola hano ganodini fi huluane amo huluane ouligima:ne ilegei dagoi.

⁹ Hina Gode! Ninia Hina Gode! Dia gasa bagade hou da osobo bagade huluane ganodini ba:lala.