Gesami Hea:su 77 - GODE EA SIA: IDA:IWANE GALA

Se Nabasu Doaga:be Eso amoga Dogo Denesisu

¹ Na da ha:giwane Godema dini iaha. Na da ha:giwane dini iasea, E da na dibi naba.

² Bidi hamosu eso da nama doaga:sea, na da Hina Godema sia:ne gadosa. Na da daeya asili hahabe, na lobo gaguia gadole, sia:ne gadosa. Be na da dogo denesisu hame ba:sa.

³ Na da Gode dawa:sea, amola bobolesa. Na da na dogo ganodini dadawa: ahoasea, na da da:i dione dawa:sa.

⁴ Gode da daeya asili hahabe na mae golama:ne si daganesisa. Na da bagadewane se nabawane dadawa:beba:le, sia:mu gogolesa.

⁵ Na da eso bobaligila asi amo dawa:lala. Amola ode musa: bobaligila asi amo dawa:lala.

⁶ Na da gasi ganodini osodogone asigi dawa:suga dadawa: ahoa. Na dogo ganodini dawa:be amoga na da nisu agoane adole ba:sa,

⁷ “Hina Gode da eso huluane nini higama:bela:? E da ninima eso huluane hahawane hame ba:ma:bela:?

⁸ E da ninima asigilalusu amo yolebela:? Ea ninima ilegele sia:i amo da yolesila:?

⁹ Gode da ninima asigi gogolema:ne olofosu hou amo gogolebela:? Ea asigi hou da afadenene bu ougi hou amoga dedebobela:?”

¹⁰ Amalalu, na da amane sia:i, “Na baligili se nabasu da agoaiwane gala. Gode da Ea gasa hou fisi dagobela:?”

¹¹ Hina Gode! Na da Dia bagadedafa hamobe hou bu dawa:lumu. Na da noga:idafa bagade hamobe Dia da musa: hamoi, amo dawa:lumu.

¹² Na da Dia hamoi liligi huluane bu dawa:lumu. Dia gasa bagade hamobe liligi, amo na da dawa:lumu.

¹³ Gode! Dia hamobe liligi huluanedafa da hadigi fawane. Eno ‘gode’ liligi da Di agoai hame. Bai Di da baligili bagadedafa.

¹⁴ Di da Gode amo da degabo ba:su hou hamosa. Di da fifi asi gala amo ganodini Dia gasa bagade hou olelesu.

¹⁵ Di da Dia gasa bagade amoga Dia fi dunu gaga:i. Dia fi dunu da Ya:igobe amola Yousefe elagaga fi esala.

¹⁶ Gode! Hano huluane da Diba:le beda:i. Amola hano wayabo bagade ea lugudu sogebi ilia da yagugui.

¹⁷ Mu mobi da gibu hano sogadigi. Gugelebe da mu amoga gobagala:su. Ha:ha:na da la:idi la:idi huluane digagala:su.

¹⁸ Gugelebe da gobagala:su. Ha:ha:na digagala:su da osobo bagade hadigilisisu. Osobo bagade da fofogoi dagoi.

¹⁹ Di da hano gafului amodili ahoasu. Di da hano wayabo bagade lugudu amo degesu. Be Dia emo osa:ibu da hamedafa ba:su.

²⁰ Mousese amola Elane ela da Dia fi ouligisu. Be Di fawane, sibi ouligisu dunu agoane, ili oule asi.