Gesami Hea:su 74 - GODE EA SIA: IDA:IWANE GALA

Isala:ili fi Dunu da Ili Gode Ea Gaga:ma:ne Ema Sia:ne Gadosu

¹ Gode! Di da abuliba:le amaiwane nini higale fisiagabela:? Di da Dia fidafa dunu ilima eso huluane ougiwane dialoma:bela:?

² Dia fi dunu amo bu dawa:ma! Di da musa: hemonega Dia fi dunu Disu ili ilegele lai. Ilia da udigili hawa: hamonanu. Be Di da ili amoga fadegale, Dia fidafa esaloma:ne gadili oule asi. Di da musa: Saione Goumia esalu. Amo bu dawa:ma!

³ Saione Moilai Bai Bagade mugului amoba:le ososa: masa. Ninia ha lai da liligi huluane Debolo ganodini galu amo wadela:lesi dagoi.

⁴ Dima ha lai dunu ilia hasalasisa gugulubi da Debolo diasu ganodini nabi dagoi. Ilia da ilia hasalasu olelema:ne, ilia da ilia eso gosagisu amogawi bugi dagoi.

⁵ Ilia da ifa damusu dunuga ifa goaheiga damuni salabe, agoaiwane ba:su.

⁶ Ilia da ifa gaga:i huluane amo ilia goahei amola ha:ma bagade amoga gagoudane salasu.

⁷ Ilia da Dia Debolo wadela:lesili, laluga ulagisi. Ilia da sogebi amoga dunu da Dima nodone sia:ne gadosu, amo ledo hamone, wadela:lesi dagoi.

⁸ Ilia da nini huluanedafa gugunufinisimusa: hanai galu. Hadigi sogebi huluanedafa Isala:ili soge ganodini galu, amo ilia da ulagili sali.

⁹ Ninia sema dawa:digima:ne olelesu liligi huluane da asi dagoi, hame ba:sa. Balofede (Gode Sia: Alofesu dunu) afae yolesi da hamedafa. Amola dunu afaega amo hou dagomu eso hame dawa:.

¹⁰ Gode! Habowali seda ninima ha lai dunu ilia da Diba:le oufesega:noma:bela:? Ilia da eso huluane mae fisili gebewane Dia Dio gadela:loma:bela:?

¹¹ Abuliba:le Dia da nini fidimu higabela:? Abuliba:le Dia lobo da baligiagai ganabela:?

¹² Gode! Di da osobo bagade hamoia amogainini, ninima Hina Bagade esalu. Di da eso bagohame nini gaga:lalu.

¹³ Di da Dia gasa bagade amoga hano wayabo bagade amo dogoa hedofalesi. Amola hano wayabo bagade ohe fi liligi ilia dialuma goudai.

¹⁴ Di da ohe bagade (Lefaiada:ne) ea dialuma sasalugufai amo goudanesili, ea da:i amo hafoga:i sogega ohe fi iligili moma:ne i.

¹⁵ Di da hano bubuga:su amola gu hano masa:ne doasi. Di da hano bagade amo hale, hafoga:lesi.

¹⁶ Di da gasi amola hayo hahamoi. Di da eso amola oubi elea lelebe sogebi amoga sagasi.

¹⁷ Di da osobo bagade ea alalo hamoi. Di da woufo amola ode i amo hahamoi.

¹⁸ Be Hina Gode! Dima ha lai dunu ilia Dima ousa. Amola ilia Di hame dawa: amola Dima higasa. Amo Di bu dawa:ma.

¹⁹ Dia fi gasa hamedei dunu, ilia dodona:gi ha lai dunu ilima hasalasisa:besa:le, ili mae fisiagama! Dia fi dunu da enoga se bagade nababeba:le, amo mae gogolema.

²⁰ Dia ninima sema gousa:su hamoi amo bu dawa:loma! Ninia soge amo ganodini, gasi dunasi la:idi bega: asili la:idi bega:, amo ganodini bidi hamosu amola wili gala:su fawane ba:sa.

²¹ Dia banenesi fi dunu mae gogosiama:ma! Amola hame gagui hahani dunu Dima nodone sia:ma:ma!

²² Gode! Di wa:legadoma! Dia hou heda:ma:ne gaga:ma! Gode Ea hou hame dawa: dunu ilia hahabe asili daeya huluane Diba:le oufesega:sa, amo dawa:ma.

²³ Dima ha lai dunu ilia da Dima ougiba:le, mae fisili halalalebe, amo mae gogolema!