Gesami Hea:su 64 - GODE EA SIA: IDA:IWANE GALA

Gaga:ma:ne Sia:ne Gadosu

¹ Gode! Bidi hamosu da nama doaga:i dagoi. Na sia:ne gadosu nabima! Na da nama ha lai dunu amoba:le beda:i galebe. Amaiba:le Dia na esalusu amo gaga:ma!

² Wadela:i hamosu dunu ilia da na fane legemusa: ilegesa. Dia na gaga:ma! Amola ilia da na wadela:lesimusa: gegedobeba:le, na gaga:ma.

³ Ilia fedege agoane, ilia gona:su amo gegesu gobihei debebe agoane debele, amola dodona:gi sia: bagohame dadi agoane gala:musa: disa.

⁴ Ilia hedolowane mae gogosiane, ogogosu sia: sisia: laha. Ilia baligidu sia: amoga da dunu moloidafa wadela:lesisa.

⁵ Ilia da ilia wadela:i ilegele sia: fasu ganodini, dabele dogo denesima:ne ilia sia: daha. Ilia da sanenesimu sogebi ilegesa. Ilia da amane sia:sa, “Dunu afaega da ninia sanenesibi hame ba:sa.”

⁶ Ilia da wadela:ma:ne ilegele, amane sia:sa, “Ninia da wadela:i hou noga:idafa hamomusa: ilegei dagoi.” Osobo bagade dunu ea dogoga asigi dawa:su da hame dawa:mu liligi agoai galebe.

⁷ Be Gode da Ea dadiga ilima gala:le, amola ilia da hedolowane fofa:gi ba:sa.

⁸ Ilia sia: amoea baiga, Gode da ili gugunufinisimu. Ilima ba:be dunu da ilia dialuma fofoga:mu.

⁹ Ba:be dunu ilia da huluane beda:igia:mu. Ilia da Gode Ea hamoi amo dawa:mu amola Ea hamoi amo adodomu.

¹⁰ Moloidafa dunu huluane ilia da nodogia:mu. Bai Hina Gode Ea hamoi ba:beba:le. Ilia da Ema gaga:su ba:mu. Amola noga:i dunu huluane ilia da Ema nodone sia:mu.