Gesami Hea:su 63 - GODE EA SIA: IDA:IWANE GALA

Godema Fofagiba:le Dawa:digisu

¹ Gode! Di da Na: Gode! Amola na da Di fofagili dadawa:lala! Na da:i amoga Dima hanasu da hafoga:i soge hano hamedei isui agoai gala amo da hano hanai, amo defele, na a:silibu da Dima hanai.

² Na da Dia Hadigi Sogebi amo ganodini ba:ma:ma! Amola na da Dia Bagadedafa hou amola Dia Hadigi hou ba:ma:ma.

³ Dia maedafa fisili asigidafa hou da osobo bagade esalusu amo baligi! Amaiba:le, na da Dima nodone sia:mu.

⁴ Na da na fifi ahoanusu huluanedafa amo ganodini Dima nodone sia:nanumu. Amola na da lobo gaguia gadole, Dima nodone sia:ne gadomu.

⁵ Na a:silibu da lolo maiba:le, bagade sadi ba:mu, amola na da obenanewane dima nodone gesami hea:mu.

⁶ Na da golasu da:iya diala, daeya asili hahabe Dima dadawa:lala.

⁷ Bai Di da nama eso huluane fidisu. Dia ougiaga ougi gala:i amo ganodini, na da nodone gesami hea:lala.

⁸ Na da Dima madelagili gilisisa. Amola na da Dia loboga gebewane gaga:i diala.

⁹ Dunu amo da na fane legemusa: dawa:lebe, ilia da bogosu sogebi amoga gudu sa:imu.

¹⁰ Ilia da gegesu amo ganodini fane lelegei ba:mu, amola ilia da:i hodo huluane da wufi sigua wa:mega na dagoi ba:mu.

¹¹ Bai Gode da ema hasalasu hou iabeba:le, Hina bagade dunu da Ema nodomu. Nowa da Gode Ea Dioba:le ilegele sia:sea, ilia da Ema nodone sia:mu. Be ogogole sia:su dunu ilia lafi da gadulisi dagoi ba:mu.