Gesami Hea:su 62 - GODE EA SIA: IDA:IWANE GALA

Gode Ea Gaga:su Amoga Ga:nasili Aligisu

¹ Na da Gode Ea na gaga:ma:ne gebewane ouesala. Na da Ea fawane hamoma:ne ouesala.

² Ea fawane da na gaga:sa. E da na Gaga:sudafa. Amaiba:le na da enoga hamedafa hasali dagoi ba:mu.

³ Nama ha lai huluane, dilia! Na gasa da gagoi gadelale sa:i, amo defele gala. Amaiba:le, habowali seda dilia da nama doagala:ma:bela:?

⁴ Dilia da udigili fawane amo nama, na nodosu sogea amogainini gudu sa:ima:ne hamosa amola dilia da ogogole nodosu hamosa. Dilia da nama nodoma:ne sia: sia:sa, be dilia dogo ganodini da nama gagabusa.

⁵ Na da Godema fawane fa:no bobogesa. Na dafawane hamoma:beyale dawa:su da Ema fawane gala.

⁶ Gode Hisu fawane da na Gaga:sudafa gala. Amaiba:le na da enoga hamedafa hasali dagoi ba:mu.

⁷ Gode Hi fawane da hamonanebeba:le, na da gaga:i dagoi, amola eno dunu da nama nodone dawa:sa. E da na Gaga:su gasa bagadedafa gala. E da na ougihalesisu gala.

⁸ Na dunu! Eso huluane Godema dafawaneyale dawa:ma! Dilia bidi hamosu huluane Ema adoma! Bai E da ninia wamoaligisu sogebi gala.

⁹ Osobo bagade dunu huluane da mifo afae fulabolesibi agoai gala. Dunu bagade amola fonobahadi huluane, da defele hamedei amola wadela:i gala. Ilia da dioi defesu da:iya ligisili ba:sea, dioi defesu da heda:i hamedafa ba:sa, ilia da mifo fulaboi afae ea hagi defele hagi gala.

¹⁰ Dilia dafawaneyale dawa:su amoga gasa fili, eno dunu banenesimusa: mae dawa:ma. Liligi wamolale bagade gagumusa: mae dawa:ma. Amola dilia liligi gagui da bagade heda:sea, amoma bagade mae fa:no bobogema.

^11-12 Na da Gode Ea agoane sia:be enoenoia nabi. “Gasa bagade hou da Na: fawane, amola mae fisili asigidafa hou da Na: fawane.” Hina Gode! Di Disu fawane, dunu ilia hou hamobe defele, ilima bidi iaha!