Gesami Hea:su 61 - GODE EA SIA: IDA:IWANE GALA

Gaga:ma:ne Sia:ne Gadosu

¹ Gode! Na Dima diniyabe amo nabima! Amola na Dima sia:ne gadobe nabima!

² Na da heawi amola fofagiba:le, na fifi lasu badiliadafa amogainini Dima wele sia:sa! Di da na wamoaligisu sogebi amoga oule masa.

³ Bai Di da nama ha lai dunu, ilia na hasalasisa:besa:le gasa bagade gaga:sudafa gala.

⁴ Na esalabea gowane Dia Hadigi Sogebi ganodini esaloma:ma. Amola na da Dia ougiaha amo ganodini gaga:su ba:ma:ma.

⁵ Gode! Di da na sia: ilegebe amo nabi dagoi. Amola Dia da Dima nodone sia:be ili iabe, amo nama i dagoi.

⁶ Osobo bagade hina da mae bogole gebewane esaloma:ma! Amola e da esaloma:ne ea ode ga gasigagama!

⁷ Gode! E da Dia midadi aligili, ea fi mae fisili eso huluane ouligilaloma:ma. Dia mae fisili asigidafa hou, amoga Dia e gaga:ma.

⁸ Amaiba:le na da Dima hahabe asili daeya huluane imunusa: ilegei amo iaha, na da eso huluane Dima nodone gesami hea:lumu.