Gesami Hea:su 59 - GODE EA SIA: IDA:IWANE GALA

Gaga:ma:ne Sia:ne Gadosu

¹ Na Gode! Nama ha lai dunu ilia na fane legesa:besa:le, Dia na gaga:ma! Nama ha lai dunu da nama doagala:be amoga na gaga:ma!

² Amo wadela:i hamosu dunu ili na fane legesa:besa:le, na gaga:ma.

³ Ba:ma! Ilia da na fane legemusa: oulela. Dodona:gi dunu ilia da na fane legemusa: gegedosa. Bai na wadela:i hou hamoiba:le, hame amaha.

⁴ Hina Gode! Na da giadofale hame hamoi. Be ilia da hedolowane na doagala:musa: oulelefula.

⁵ Hina Gode Bagadedafa! Na fidimusa: wale gadoma! Isala:ili Gode! Disu ba:ma! Walegadole, wadela:i hamosu dunuma se bidi ima! Wadela:i hohonosu dunu ilima mae asigima!

⁶ Ilia da wa:mega gesenebe agoane, daeya bu misini, moilai bai bagade ganodini gegesenesa ahoa.

⁷ Ilia odagia gadesa amola magagisu hou amo nabima! Ilia lafi ganodini gona:su da gegesu gobihei agoai gala. Be ilia hamobe amo da enoga hame nabahayale, ilisu dawa:sa.

⁸ Be Hina Gode! Di da iliba:le ousa! Di da wadela:i hamosu dunu huluane amoba:le oufesega:sa.

⁹ Gode! Di da gasa bagadeba:le, na da hahawane bagade Dia hou dafawaneyale dawa:sa. Gode! Di da na wamoaligisu sogebi gala.

¹⁰ Na Gode da nama asigisa. Amola E da nama fidimusa: misunu. E da na siga ba:ma:ne, nama ha lai dunu ili hasalimu.

¹¹ Gode! Na fi dunu ilia Dia hou gogolesa:besa:le, nama ha lai dunu mae fane lelegema. Be ninia Hina Gode! Ninia Gaga:su! Dia gasaga ili afagogolesili, ili hasalima.

¹² Ilia wadela:i hou da ilia lafi gadofo da:iya diala. Ilia sia:be huluanedafa da wadela:i sia: fawane sia:sa. Ilila: gasa hidale hou hamobeba:le, ilia da fedege agoane saniga sa:i dagoi ba:mu da defea.

¹³ Ilia da wadela:i sia: amola ogogosu bagade sia:beba:le, Dia ougi hou amoga ili dafawanedafa gugunufinisima. Amasea, dunu huluanedafa da Gode da Isala:ili fi dunu amola osobo bagade fifi asi gala dunu huluanedafa ili ouligisa, amo dawa:mu.

¹⁴ Nama ha lai dunu, ilia da wa:mega gesenebe agoane, daeya bu misini, moilai ganodini gegesenesa ahoa.

¹⁵ Ilia da wa:me ha:i manu hogola labe amola ha:i manu hame galea gaga:nosa labe, agoai gala.

¹⁶ Be na da Dia gasa dawa:beba:le, gesami hea:mu. Hahabe huluanedafa, na da Dia mae fisili asigidafa hou amoma nodoma:ne, gesami ha:gidafa hea:mu. Di da na bidi hamosu ba:i eso amoga, na wamoaligisu sogebi dialebe ba:i.

¹⁷ Na Gaga:sudafa! Na da Dima nodomu! Na wamoaligisu sogebi da Gode! Amola Gode da nama hahawane dogolegesu gala.