Gesami Hea:su 58 - GODE EA SIA: IDA:IWANE GALA

Gode da Wadela:i Hamosu Dunuma Se Dabe Ima:ne Sia:ne Gadosu

¹ Dilia ouligisu dunu da afae moloidafa fofada:su dawa:sala:? Dilia da dunu huluane ilima defeledafa fofada:sala:?

² Hame mabu! Dilia da wadela:i hou amola soge ganodini sesele fane legesu hou amo fawane hamomusa: dawa:lala.

³ Wadela:i hamosu dunu da ilia esalusu ganodini wadela:i hou fawane hamonana. Ilia da ilila: lalelegei eso amogainini ogogosu hou fawane hahamona mana.

^4-5 Ilia da saya:be defo defele amoga nabai gala. Ilia da saya:be hi gobele ge ga:be amo da ea ouligisu dunu amola sema nabi dunu ea hamoma:ne sia:i hame naba, amo defele, ilia da Gode Ea sia: hamedafa naba.

⁶ Gode! Ilia da nimi bagade laione wa:me agoai ba:sa. Ilia bese guguma!

⁷ Ilia da hano yogo agoane asili hame ba:sa, Amo defele, ilia amola da mini masunu da defea. Ilia wadela:i gisi logo sa:ili, osa:gi agoai ba:ma:ma.

⁸ Ilia da gulu amo da hayoga ahoasea, eso gia:sea daeyabe, amo defele agoane ba:mu da defea! Ilia da mano bogoiwane lalelegele hayo hame ba:be agoaiwane ba:mu da defea.

⁹ Ilia da hame dawa:igawane, wadela:i gisi damui agoai ba:mu. Ilia da esaleawane, Gode da ougili ili fulabole fasimu.

¹⁰ Moloidafa dunu da wadela:i hamosu ilia se dabe labe ba:sea, hahawane ba:mu. Ilia da wadela:i hamosu dunu ilia maga:me degele masunu.

¹¹ Osobo bagade dunu da amane sia:mu, “Dafawane! Gode da moloidafa dunuma noga:i bidi sagosa! Dafawane! Osobo bagade fifi asi gala ilima fofada:ma:ne, Godedafa da esala!”