Gesami Hea:su 57 - GODE EA SIA: IDA:IWANE GALA

Fidima:ne Sia:ne Gadosu

¹ Gode! Nama asigima! Nama asigima! Bai na da Dima gaga:su lamusa:ne maha. Dia ougiaha baba gala:i amoga na da gaga:su ba:su. Amogai esaleawane mulu maha gulubagebe amo dagoiba:le fawane yolesimu.

² Na da Gadodafa Godema wele sia:sa. Bai E da na wali esaloma:ne lamu liligi defele nama iaha.

³ E da Hebenega amogainini nama dabe adole imunu amola na gaga:mu. E da nama banenesi dunu ili hasalimu. Gode da nama Ea mae fisili asigidafa hou olelemu.

⁴ Nama ha lai dunu ilia na eale sisiga:le disisa. Ilia da laione wa:me amo da dunu fane manusa: hanai agoai. Ilia bese da goge agei amola dadi agoai gala. Amola ilia gona:su da gegesu gobihei ageisoi agoai galebe.

⁵ Gode! Dia gasa bagade hou amo mu da:iya olelema! Amola Dia hadigi hou osobo bagade fifi asi gala huluane ilima olelema.

⁶ Nama ha lai dunu da na sa:ima:ne efe gelesi dagoi. Na da se bagade nababeba:le, gala:la sa:i agoai ba:sa. Ilia da na sa:ima:ne uli dogonesi. Be ilia da ili gobele ilila: amoga sa:i dagoi.

⁷ Gode! Na da Dima dafawaneyale dawa:i dagoi. Na da Dima nodosa gesami hea:mu amola Dima nodomu.

⁸ Na a:silibu! Nedigima! Na sani baidama amola na ‘laia’ dusu liligi! Nedigima! Na da amoga eso didilisimu!

⁹ Hina Gode! Na da fifi asi gala amo ganodini Dima nodomu! Na da dunu fifi asi gala huluane amo ganodini Dima nodone sia:mu.

¹⁰ Dia mae fisili asigidafa hou da muagado doaga:sa! Dia hame fisisu hou da muagado digila heda:sa!

¹¹ Gode! Dia gasa bagade hou amo muagado ganodini olelema! Amola Dia hadigi hou amo osobo bagade fifi asi gala dunu huluane ba:ma:ne, olelema!