Gesami Hea:su 55 - GODE EA SIA: IDA:IWANE GALA

Dunu amo da ea Samaga Hohono Hamoi, amo ea Sia:ne Gadosu

¹ Gode! Na sia:ne gadobe nabima! Na Dima edegebe amo mae yolesima!

² Na sia: nabima amola na sia:be goea bu dabe adole ima. Na da gufia:ne hamoiba:le, gasa hame gala.

³ Nama ha lai da nama magagibiba:le, na da bagade beda:i. Wadela:i hamosu dunu da na banenesibiba:le, na da gala:la sa:i dagoi. Ilia da nama bidi hamosu gaguli maha. Ilia da nama ougi gala amola na higasa.

⁴ Na da baligili beda:i. Na da bogosa:besa:le bagade beda:i, amola banenesi dagoi ba:sa.

⁵ Na da beda:ga yagugulala. Na da beda:ne se nabasu amoga gagulaligi.

⁶ Na da ougia hamoi ‘dafe’ sio agoai ganeya:be. Amai ganiaba, na da amoga hagili asili, helefimu soge hogola:loba.

⁷ Na da hagili badiliadafa hafoga:i sogega fifi lasu hamona:noba.

⁸ Na da fo amola mulu gulubagebe amoga fasa:besa:le, ougiha wamoaligimusa: hedolowane fimusa: hogola:loba.

⁹ Hina Gode! Nama ha lai dunu ilia sia:mu liligi huluane ededenanesima! Na da moilai bai bagade ganodini, gegesu amola bidi hamosu bagadewane ba:lala.

¹⁰ Amo bidi hamosu da bagadeba:le, gasia amola hayoga fedege agoane moilai bai bagade sisiga:le disisa.

¹¹ Gugunufinisi hou da soge huluane ganodini ba:sa. Moilai bai bagade logo da banenesisu hou amola fedele wamolasu amoga nabai gala.

¹² Be nama ha lai dunu da nama lasogole sia:sa ganiaba, na da hame da:i dione dawa:la:loba. Amola nama dabesu dunu da nama hidale sia:sa ganiaba, na da ema hobeale wamoaligimu dawa:la:loba.

¹³ Be di, na dogolegei sama disu da nama lasogole amola hidale sia:nana.

¹⁴ Ani da musa: gilisili osodogone sia:dasu. Ania da Debolo ganodini Godema nodone sia:ne gadosu.

¹⁵ Nama ha lai dunu ilia da ilia bogosu eso mae doaga:le, bogomu da defea. Ilia da esaleawane, bogoi sogega gudu sa:imu da defea. Wadela:i hou da ilia diasu gaguli gagai amola ilia dogo amo ganodini dialebe ba:sa.

¹⁶ Be na da Hina Godema, na fidima:ne wele sia:sa. Amasea, E da na gaga:mu.

¹⁷ Hahabe amola esomogoa amola gasia, na egasu sia: amola na gogonomosu da Ema heda:sa. Amola E da na sia: nabimu.

¹⁸ Na da nama ha lai dunu bagohame ilima gegena ahoa. Be Hina Gode da na gaga:iwane bu goeguda: oule misunu.

¹⁹ Gode da musa: hemoneganini, ouligisa mana wali doaga:i. E da na sia: nabimu amola nama ha lai dunu ili hasalimu. Bai ilia da afadenemu higasa amola Godema hame beda:sa.

²⁰ Na musa: dogolegei sama da ea sama ili amo doagala:le, amola e da ea ilelegele sia:i amo fi dagoi.

²¹ Ea sia: da ha:i manu gugui defele nabi. Be ea dogo ganodini, ougili higasu fawane galu. Ea sia: da susuligi noga:i defele nabi. Be amo sia: da gegesu gobihei agesoi defele, fa:ginisi.

²² Dilia! Dilia da:i dioi amola se nabasu huluane amo Godema yolesima. Amasea, E da dili gaga:mu. Ea fidibiba:le, moloidafa dunu da hamedafa hasali dagoi ba:sa.

²³ Be Di, Gode! Di da amo fane legesu dunu amola wamolasu dunu amo fane legemu. Ilia esalusu dogoa hame doaga:i galeawane, Di da ili bogoi uli dogosu sogebi amoga oule masunu. Be amomane na da Dima fawane dafawaneyale dawa:mu.