Gesami Hea:su 51 - GODE EA SIA: IDA:IWANE GALA

Gogolema:ne Olofosu Lama:ne Sia:ne Gadosu

¹ Gode! Nama asigima! Bai Di da mae fisili asigidafa hou amola gogolema:ne olofosu hou dawa:. Amaiba:le, na wadela:i hou huluane doga:le fasima.

² Na da bu foloai ba:ma:ne, na wadela:i ledo hou amo dodofele fasima.

³ Na da ni giadofale hamosu amo ea bai amo ni ba:le, dawa:digisa. Na da eso huluane wadela:i hou na hamoi, amo dawa:digisa.

⁴ Na da enoma hame wadela:le hamoi, be Dima fawane wadela:le hamoi. Amola Dia higa:i ba:su, amo na da giadofale hamoi. Amaiba:le Dia nama fofada:mu da defea, amola Di da moloidafaba:le nama fofada:ne, diwaneya udidili, nama se dabe imunu da defea.

⁵ Na da na lalelegei esoha amogaini wadela:i hou hahamona misi. Na da na:me ea hagomoga mano hahamoia amoganini wali, wadela:i hou hahamona misi.

⁶ Dia da moloidafa amola dafawanedafa hou amo ilegesa. Amaiba:le Dia na asigi dawa:su amo Dia bagade dawa:su amoga nabalesima.

⁷ Na wadela:i hou hamoi amo Dia doga:le fasima. Amasea na wadela:i hou da doga:iba:le, na da foloai dagoi ba:mu. Na wadela:i hou dodofelesima. Amasea na da foloaidafa mu gohona: amo baligi ba:ma:ma.

⁸ Na da hahawane nodosu sia: amo nabima:ma, be amomane Di da na dadalega:le amola dadamunisali galu. Be na da bu hahawane hamoi ba:mu.

⁹ Di da na wadela:i hou hamoi amoga si sisigili mae ba:ma! Amola na wadela:i hou hamoi huluane doga:le fasima!

¹⁰ Gode! Nama dogo gaheabolo hahamonesili, na da:i hodo ganodini salima! Amola a:silibu gaheabolo amola Dima fa:no bobogesu fisisu hame dawa: a:silibu, amo na da:i hodo ganodini salima.

¹¹ Dia midadi amoga na mae fisiagama! Dia A:silibu Ida:iwane Gala nama mae fadegale fasima!

¹² Di da dunu gaga:sea, ilia da hahawane bagade ba:sa. Amo hahawane hou nama bu ima. Na da Dima bu nabawane fa:no bobogema:ne, Dia hahamonesima!

¹³ Amasea, na da wadela:i hamosu dunu ilima Dia hamoma:ne sia:i olelemu. Amola ilia da amo nababeba:le, Dima bu sinidigimu.

¹⁴ Gode! Na esalusu gaga:ma! Amasea na da nonodoia Dia moloidafa hou enoma sisia:i lamu.

¹⁵ Hina Gode! Na sia: sia:ma:ne fidima! Amasea, Na da Dima nodone sia:mu.

¹⁶ Di da gobele salasu lamu hame hanai. Di da amo lamu hanai ganiaba, na da amo Dima ia:noba. Di da gobei gobele salasu amoma hame nodosa.

¹⁷ Gode! Na Dima gobele salasu da asaboi a:silibu fawane. Na dawa:! Di da asabole amola Dima sinidigimusa: dawa:su dunu amo hame higamu.

¹⁸ Gode! Saione Moilai Bai bagade amoma asigima! E fidima! Yelusaleme ea dobea fei amo bu gaguma!

¹⁹ Amasea, Di da gobele salasudafa amola ninia gobei gobele salasu amo nodone ba:mu. Amola bulamagau gawali da Dia oloda da:iya gobele salabe ba:mu.