Gesami Hea:su 5 - GODE EA SIA: IDA:IWANE GALA

Gode Ea Gaga:ma:ne Sia:ne Gadosu

¹ Hina Gode! Na sia: nabima, amola na gogonomasu nabima.

² Na Gode amola na Hina Bagade! Na Dima fidima:ne wele sia:sea, Di da na wele sia:su nabima. Hina Gode! Na da Dima sia:ne gadosa.

³ Di da na sia: hahabe naba. Eso mabe galu na da Dima sia:ne gadosa, amola Dia adole iasu ouligisa.

⁴ Di da wadela:i hou amo hahawane hame ba:sa. Wadela:i hou da Dia midadi dialumu da hamedei.

⁵ Dia da gasa fi dunu amo ba:mu bagadewane higasa. Di da wadela:i hamosu dunu huluane higasa.

⁶ Di da ogogosu dunu huluane wadela:lesisa. Amola nimi bagade ogogosu dunu, amo Di higasa.

⁷ Be na da Dia diasu ganodini golili sa:imu dawa:. Bai Di da asigi bagadedafa dunu. Na da Dia hadigi Debolo diasu ganodini Dima muguni bugili, Dima nodomusa: dawa:.

⁸ Hina Gode! Nama ha lai dunu da bagohame gala. Dia hanai hawa: hamomusa: amoga na oule masa. Amola, na da moloiwane masa:ne, na logo noga:le fodoma.

⁹ Na ha lai dunu ilia sia:be amo da dafawaneyale hame dawa:mu. Ilia da gugunufinisimusa: fawane dawa:. Ilia sia: da sefe agoai ba:sa, be ilia dogo ganodini hohonosu hou fawane ba:sa.

¹⁰ Hina Gode! Di ilima fofada:nanu, se bagade ima. Ilisu ilia wadela:i sia: dasu da ilima wadela:su liligi ba:mu da defea. Ilia da wadela:i hou bagade hamobeba:le, amola Dima odoga:beba:le, ili gadili sefasima.

¹¹ Be nowa da Dia gaga:su ba:sea da hahawane bagade ba:mu. Ilia da eso huluane Dima hahawane nodone gesami hea:lalumu. Dima asigisu dunu amo Di gaga:ma. Ilia Diba:le, hahawane houdafa dawa:.

¹² Nowa dunu da Dima nabawane fa:no bobogesea, Di da hahawane fidisa. Dia asigidafa hou da ilima gaga:su liligi agoai ba:sa.