Gesami Hea:su 48 - GODE EA SIA: IDA:IWANE GALA

Saione - Gode Ea Moilai Bai Bagade

¹ Hina Gode da bagadedafa. Amola Ema baligiliwane nodomu da defea. Ea Moilai Bai Bagade amola Ea sema agolo amogai Ema baligiliwane nodomu da defea.

² Gode Ea Goumi amo Saione, da gadodafa amola ida:iwanedafa gala. Hina Bagadedafa Ea Moilai Bai Bagade da osobo bagade fifi asi gala dunu huluane ilima hahawane hou iaha.

³ Gode da Ea gagili sali Moilai Bai Bagade amo ganodini esala. Amola nowa da amo ganodini E gilisili esalea, amo dunu da gaga:su ba:mu. Gode da amo hou olelei dagoi.

⁴ Osobo bagade hina bagade dunu da gilisili, Saione Goumi doagala:musa: misi.

⁵ Be ilia da amo ba:loba, fofogadigili, bagade beda:i. Beda:iba:le, ilia hobea:i dagoi.

^6-7 Uda da mano lalelegemu gadenesea se nabasu amo defele, amola dusagai bagade hano wayabo bagade ahoanoba, mulu amo ganodini gigiwigisu defele, ilia beda:i bagade amola se nabi dagoi.

⁸ Ninia da Gode Ea hamobe amo ninia gega nabi dagoi. Amola wali ninia da ninia Hina Gode Bagadedafa Ea Moilai Bai Bagade amo ganodini Ea hamobe ninia siga ba:i dagoi. E da Ea Moilai Bai Bagade mae fisili gaga:lalumu.

⁹ Gode! Ninia da Dia Debolo Diasu ganodini Dia maedafa fisili asigidafa hou amo dawa:lala.

¹⁰ Osobo bagade fifi asi gala dunu huluanedafa da Dia hou dawa:. Amola amoba:le nodosa. Bai Di da moloidafawane ouligilala.

¹¹ Saione esalebe dunu ilia da hahawane ba:mu da defea. Bai Dia da moloidafa fofada:su hamosa. Yuda moilai ganodini amo hahawane hou dialumu da defea.

¹² Gode Ea fi dunu, dilia! Saione Moilai Bai Bagade sisiga:le ahoa gagagula heda:le gagai diasu amo idima!

¹³ Fa:no fifi mabe ilima olelemusa:, dobea fei amola gagili gagoi amo abodema. Bai dilia da fa:no fifi mabe ilima amane sia:ma:ne,

¹⁴ “Goe Gode da ninia Gode. E da eso huluane esalalalumu. E eso huluane mae fisili, nini bisili ouligilalumu.”