Gesami Hea:su 4 - GODE EA SIA: IDA:IWANE GALA

Daeya Gode Ea Fidima:ne Sia:ne Gadosu

¹ Na sia:ne gadobe goe bu sia:ne ima. Hina Gode, Di da na gaga:su dunu. Na se nabaloba, Dia na fidi. Wali, Di da nama asigima amola na sia:ne gadobe nabima.

² Eso habowali dilia fi dunu da nama higama:bela:? Eso habowali dilia da hamedei liligi amo hanama:bela:, amola ogogosu liligi amoma fa:no bobogema:bela:?

³ Dawa:ma! Hina Gode da moloidafa noga:i dunu amo Ea fidafa hamomusa: ilegei dagoi. Amola na da Ema wele sia:sea, E da na wele sia:su naba.

⁴ Dilia beda:ga yaguguma! Amola wadela:le hamosu hou fisima. Dilia da ouiya:le agoane dilia debea da:iya dialea, bagade dadawa:laloma.

⁵ Gobele salasu moloidafa amo Hina Godema ima, amola Ema dafawaneyale dawa:ma.

⁶ Dunu bagohame da agoane sia:ne gadosa, “Hina Gode! Ninima Dia hahawane fidisu hou baligili ima. Ninima asigiwane ba:ma.”

⁷ Ilia da gagoma amola waini lai dagoiba:le hahawane ba:sa. Be hahawane hou Di da nama i dagoi, amo da amo osobo bagade hou bagadewane baligisa.

⁸ Na diasa:ili gasia golai dialoba, hahawane golasa. Hina Gode! Di fawane da na noga:le gaga:sa.