Gesami Hea:su 36 - GODE EA SIA: IDA:IWANE GALA

Osobo Bagade Dunu Ilia Wadela:i Hou

¹ Wadela:i hou da wadela:i hamosu dunu ea dogo ganodini osodogone sia: daha. E da Godema higale amola Ema hame nodosa.

² E da Gode da ea wadela:i hou hame ba:sayale amola amoga se dabe hame ima:bela:le dawa:lala. Bai hi da hidale hina:musu baligili gadodafa dafawaneyale dawa:lala.

³ Ea sia: da wadela:idafa amola ogogosu amoga nabai gala. E da noga:le dawa:su hou amola noga:idafa hou, amo fisi dagoi.

⁴ E da ea golasu da:iya diala, wadela:le hamomusa: ilegele dadawa:lala. Ea hamobe amoga afae noga:idafa hame gala. Amola wadela:i hou amoga ea higamu afae da hame gala.

Gode Ea Noga:idafa Hou

⁵ Hina Gode! Dia mae fisili asigidafa hou da heda:le, muagado amoga sasanosa. Dia mae fisili fidisu hou da muagado amoga sasanosa.

⁶ Dia moloidafa hou da goumi agoane gagilisa heda:sa. Dia moloidafa fofada:su hou da hano wayabo lugudu oso dogoi defele gala. Di da dunu amola ohe fi ouligisa.

⁷ Gode! Dia mae fisili asigidafa hou da bidiga lamu hamedei galebe! Ninia da Dia ougiaha gaga:su ba:sa.

⁸ Dia da ninima ha:i manu bagohame iabeba:le, ninia da sadini naha. Dia noga:idafa hou da hano agoane, amola ninia da amo moma:ne, Dia da logo doasisa.

⁹ Di da esalusu huluane ea baidafa gala. Amola Di da Hadigidafa. Amaiba:le, ninia da hadigi ba:sa. amola moloidafa hou hamonanebe, ilima asigima!

¹⁰ Dia mae fisili, dunu ilia da Dima dawa:i dialebe amola moloidafa hou hamonanebe, ilima asigima!

¹¹ Gasa fi dunu ilia da nama mae doagala:ma:ma! amola wadela:i hamosu dunu na hobeale masa:ne, mae sefasima:ma!

¹² Wadela:i hamosu dunu ilia dafai hou ba:ma! Amogai ilia da diala, amola wa:legadomu gogolesa.