Gesami Hea:su 31 - GODE EA SIA: IDA:IWANE GALA

Godema Mae Yolele Dafawaneyale Dawa:su Sia:ne Gadosu

¹ Hina Gode! Na da Dia gaga:ma:ne Dima maha. Dia na enoga maedafa hasalasima:ma. Di da moloidafa Gode. Na da Dima sia:ne gadosa! Na gaga:ma!

² Na sia: nabima! Wahadafa na gaga:ma! Na gaga:ma:ne, fedege agoane Dia na dabe fasa:besa:le sogebi dialoma!

³ Dia da na gado sogebi amola na gaga:su gala. Dia sia:i ilegei defele, nama logo olelema amola amoga na oule masa.

⁴ Na sa:ima:ne sanenisi dialebe amoga dasa:besa:le, na fidima. Se nabasu da nama doagasa:besa:le, na ougihalesima.

⁵ Hina Gode! Na da Dia ouligisu hou amoga ouligima:ne Dima yolesimu. Di da na gaga:mu. Bai Di da mae fisili didili hamosu Gode.

⁶ Di da ogogole ‘gode’ ilima nodone sia:ne gadobe dunu, ili higasa. Be na da Dima dafawaneyale dawa:sa.

⁷ Di da nama maedafa fisili asigi hou dialebeba:le, na hahawane amola obenai dialumu. Di da na hahanibi amo ba:sa amola na bidi hamoi amo huluane Dia dawa:.

⁸ Di da nama ha lai dunu da na doagala:le fedele lama:ne hame hamoi. Di da nama soge na hanai amoga udigili laloma:ne nama sia:i dagoi.

⁹ Hina Gode! Nama asigima! Bai na da bidi hamosu amo ganodini esalebe ba:sa. Na si da dinana helesa. Na da helei baligili nabi dagoi.

¹⁰ Na da da:i dioiba:le, helele ha:ha:i dagoi. Dinanasu da na esalusu dunumuginisi dagoi. Na bidi hamosu bagade ba:beba:le, gasa hamedei gala. Na gasa amolawane da wadela:lala.

¹¹ Nama ha lai dunu huluane, amola na gadenene dunu iliamusu, nama higale ba:sa. Dunu oda na dawa: dunu da naba:le beda:sa. Ilia da na logoa ba:sea, hobeale afia:sa.

¹² Dunu huluane ilia da na bogoiyale, gogolele fisi dagoi. Ilia na galagai liligi agoai ba:sa.

¹³ Nama ha lai dunu bagohame ilia nama sadoga sia:dalebe, na naba. Na da bagadewane beda:i. Nama ha lai dunu da na fane legemusa:, sia: ilegesa.

¹⁴ Be Hina Gode! Na da Dima dafawaneyale dawa:sa. Bai Di da na Godedafa.

¹⁵ Na da eso huluane Dia ouligibi hou ganodini esala. Nama ha lai dunu, amo da nama se bagade iaha, ilia da na wadela:sa:besa:le, Dia gaga:ma.

¹⁶ Na da Dia hawa: hamosu dunu. Nama asigiwane ba:ma! Dia mae fisili asigi hou amoga na gaga:ma.

¹⁷ Hina Gode! Na da Dima wele sia:sa! Na da mae gogosiasu hamoma:ma! Be wadela:i hamosu dunu ilia gogosiasu ba:mu da defea. Ilia da ouiya:lewane bogosu sogebi amo gudu sa:imu da defea.

¹⁸ Gasa fi nimi bagade dunu da moloidafa dunu ilia hou olelema:ne, ogogole higale sia:sa. Hina Gode! Amo ogogosu dunu ouiya:lesima!

¹⁹ Dunu da Dima nodone hamosa, amo da Dia baligili noga:idafa imunusa: momagei dialebe ba:mu. Di da noga:idafa! Amola dunu amo ilia Dima dafawaneyale dawa:sa amo noga:ledafa gaga:sa. Dunu huluane da amo hou dawa:.

²⁰ Eno dunu da ili wadela:ma:ne ilegesa. Be Di da Dia midadi amoga ili gaga:musa: wamolegelesisa. Ilima ha lai dunu da ilima mae gadele sia:ma:ne, Di da ougihai gado amoga ili wamolegesa.

²¹ Hina Godema hahawane nodoma! Nama ha lai ilia da na doagala:le, eale sisiga:le disiba:le, E da Ea asigidafa hou nama olelei.

²² Na da beda:i galu amola na da Ea yolesibala:le dawa:i galu. Be na da Ea fidima:ne dini iabeba:le, E da na dibi nabi.

²³ Hina Godema mae fisili dafawaneyale dawa:su dunu huluane, dilia! Hina Godema asigima! Hi da dili gaga:sa! Be E da gasa fi dunu ilima se bidi iaha. Bai ilia da amo se iasu lamu da defea.

²⁴ Dilia! Hina Gode da hobea misunu liligi huluane ouligisa. Amo dafawaneyale dawa:su dunu, dilia! Gasa fili, gesa:idafa ba:ma.