Gesami Hea:su 29 - GODE EA SIA: IDA:IWANE GALA

Hina Gode da Mulu ganodini Sia:sa

¹ Dilia Hebene fi! Hina Godema nodone sia:ma! Ea hadigi amola gasa bagade hou amoma nodoma.

² Hina Gode Ea Hadigi Dio amoma nodoma. E da doaga:sea Ea midadi beguduma.

³ Hina Gode Ea sia: da hano wayabo bagade da:iya naba. Hadigi Gode Ea sia: da gugelebe agoane naba. Ea sia: da hano wayabo bagade da:iya gobagala:sa.

⁴ Hina Gode Ea sia: da gasa bagade amola gadodafa agoane lalaba ahoa.

⁵ Hina Gode Ea sia: da Lebanone dolo ifa amo fifila ahoa.

⁶ Ea sia:beba:le, Lebanone goumi alelaloi da bulamagau mano agoane soagala:be agoane hamosa. Amola Ea sia:beba:le, Hemone Goumi da waha debe bulamagau gawali agoane soagala:sa.

⁷ Hina Gode Ea sia: da ha:ha:na da:gini gagala:be agoane hamosa.

⁸ Ea sia:beba:le, hafoga:i soge da igugusa. E da Ga:idesie hafoga:i soge igugulisisa.

⁹ Hina Gode Ea sia: da ‘ouge’ ifa igugusa amola ea lubi da gahea dudugini dadafulala. Amogalu dunu huluane Ea Debolo diasu ganodini, “Hina Gode da Hadigidafa!” amane wele sia:sa.

¹⁰ Hina Gode da hano lugudu osodogoi amoga ouligisa. E da eso huluane mae fisili, Hina Bagade agoane ouligilalumu.

¹¹ Hina Gode da Ea fi dunuma gasa iaha. Amola E da ilima hahawane dogolegele olofosu hou iaha.