Gesami Hea:su 25 - GODE EA SIA: IDA:IWANE GALA

Gaga:ma:ne amola Logo Olelema:ne Sia:ne Gadosu

¹ Hina Gode! Na da Dima fawane sia:ne gadosa!

² Na Gode! Na da Dima fawane dafawaneyale dawa:sa. Hasalasu houba:le, na gogosiasa:besa:le, Dia na gaga:ma. Nama ha lai dunu da nama hidale habosesesa:besa:le, fidima.

³ Nowa da Dima dafawaneyale dawa:sa, ilima ha lai dunu da ilima hame hasalasimu. Be nowa da Dima lelesea, da ilia ha lai amoga hasali dagoi ba:mu.

⁴ Hina Gode! Dia hou huluane nama olelema! Na da amo dawa:digima:ne, nama olelema!

⁵ Na da Dia dafawanedafa hou defele esaloma:ne, Dia nama olelema. Bai Di da na Gode amo da na gaga:lala. Na da Dima eso huluane dafawaneyale dawa:lala.

⁶ Hina Gode Di bu dawa:ma! Di da musaganini wali, asigi amola olofosu hou olelelalusu.

⁷ Na ayeligia wadela:i hou amola giadofasu hou huluane Dia gogolema:ne olofoma. Hina Gode, Dia mae fisili asigidafa hou, amoga nama bu dawa:ma!

⁸ Hina Gode da wadela:i hamosu dunu ilia logo moloi amoga ahoasu hamoma:ne agoane olelesa. Bai Hina Gode da moloidafa amola noga:idafa.

⁹ E da asaboi amola hi hou fonoboi dunu amo, hou moloi amoga oule ahoa, amola Ea hanai hamoma:ne olelesa.

¹⁰ E da Ea gousa:su noga:le ouligisu dunu, amola Ea hamoma:ne sia:i noga:le nabasu dunu, amo E da asigiwane amola mae fisiliwane ili oule ahoa.

¹¹ Na wadela:i hou da bagohame gala. Be Hina Gode! Dia ilegele sia:i defele, na wadela:i hou gogolema:ne olofoma!

¹² Dunu amo da Hina Gode Ea sia: didili hamosea da, Ema Ea logodafa amoga masa:ne, dawa: lamu.

¹³ Ilia da eso huluane bagade gaguiwane ba:mu. Amola ilia mano da Isala:ili soge gagulaligimu.

¹⁴ Hina Gode da Hi sia: nabasu dunu ilima sama hamosa. Amola E da ilima Ea Gousa:su bu ilegesa.

¹⁵ Na da eso huluane Hina Gode da na fidimu, amo dafawaneyale dawa:be. Amola na se mae nabima:ne, E da eso huluane na gaga:lala.

¹⁶ Hina Gode! Nama ba:le guda:le, nama asigima! Bai na da fofagi amola gasa hamedei.

¹⁷ Na da:i dioi huluane lalegama! amola na da bidi hamosu mae ba:ma:ne, na gaga:ma!

¹⁸ Na da:i dioi amola se nabasu, Dia ba:ma! amola na wadela:i hou huluane gogolema:ne olofoma!

¹⁹ Nama ha lai dunu bagohame amo Dia ba:ma! Ilia nama higasu hou, Dia ba:ma!

²⁰ Ilia da Na hasalasa:besa:le, Dia na gaga:ma! Na da Dia na gaga:ma:ne, Dima mana!

²¹ Na noga:i hou amola moloi hou da na gaga:mu da defea. Bai na da Di dafawaneyale dawa:beba:le.

²² Gode! Dia dunu fi Isala:ili, ilia bidi hamosu bagade galebeba:le, ili gaga:ma.